News

Vawiin (28.8.2026) hian Working Committee on Ruihhlo Do chu an Chairman Lalnghinglova Hmar, Excise and Narcotics Minister hoin Secretariat Conference Hall-ah thu khawmin Mizorama ruihhlo dona kalpui dan hrang hrangte an thlir a, department leh pawl hrang hrangin report an pek bakah hmalak dan turte an sawiho.

Excise & Narcotics Minister Lalnghinglova Hmar chuan, “Department hrang hrang leh Central YMA report aṭanga a lan danin tun hnaiah Mizoramah heroin leh ruihna atana hman ṭhin khuh damdawi (Codeine-Based Cough Syrup) man hi a sang chak hle a, heta tang hian ruihhho hi a tawmim chho hret hret niin a lang a, thil lawmawm tak a ni. Hetih lai hian ruihhlo hi a awm ta lo a ni lo a, a mamawhtu (demand) pawh an la tam em em a, ruihhlo do leh a ti thar tur ven kawngah ṭan kan lak chhunzawm zel a ngai a ni,” a ti.

Central YMA aiawhte report-a tarlan a nih danin tun hnaiah Aizawl khawpui leh hmundangah heroin a tlem tak avang leh a man a san chak em avangin Vairengte pela ruih tur zawng Mizo ṭhalai chhuk thla an pung nasa hle a, hei hi Excise leh Police lam nen ṭangkawpin an vil reng a ni. Kolasib District SP leh Cachar District SP-te inbiain ruihhlo do kawnga thawhhona ṭha tak neih a ṭul thu sawi a ni.

Ruihhlo ti tur venna leh ti lo tura inzirtirna chu pawl, kohhran leh sorkar department hrang hrangin mahni zawn ṭheuhah an vei ang zela an kalpui ṭhin chu a lawmawmin ṭha viau mah se, kalphung mumal zawk leh au-hla inanga tinzawn neia drugs awareness campaign kalpui dan tur sawiho a ni.

Health & Family Welfare Department hnuaia Food and Drugs Administration-in ruihna atana hman khuh damdawi dan hnuaia khuahkhirh tura hma an lakna ngaihthlak a ni a; Village Level Task Force on Ruihhlo Do chak zawka kalpui dan turte rel a ni bawk.