YMA Day thuchah ti chhuak

Central YMA President R Lalngheta chuan naktuk (15.6.2026) a YMA Day lo thleng tur pualin thuchah a ti chhuak a, ruihhlo do kawngah inthlahdah thei an nih loh thu sawiin, insangmar zel turin YMA hruaitute a sawm.

CYMA President chuan, “Hmun hrang hrang a kan YMA member puite he hun hi hlim taka hmang turin duhsakna ka hlan a che u. YMA Day a lo thlen hian YMA-in kan ram leh khawtlang tana rawng kan bawlnaah inpekna thuk zawk min neih tir se ka duh hle mai. Pu V.Thangzama’n YMA nihna, ‘chanhai, riangvai te puitu, thlafam lusun te hnemtu, Kristian eng chu an lo chhi, duhaisam chu hei ngei hi’ tia a lo sawi hi vawng nung zel ila. Chanhai, riangvaite puitu, thlafam lusunte hnemtu kan nihna hi kalsan lo ila, hei hi Kristian kan nihna anga Pathian rawng kan bawlna a ni,” a ti.

Tun hnaiah YMA-ten Pathian malsawmna kan dawng nasa hle tih sawiin R Lalngheta chuan, “Kan neih theih loh tur lirthei tam tak kan Sub-Hqrs YMA leh Group YMA-ten kan dawng. Heng malsawm kan dawnte hi keini Central YMA hruaitute fel leh tlin vang ni loin YMA kaltlanga ram rawng kan bawlnaah theihțawp kan chhuahzia hretute kaltlanga Pathian malsawmna kan dawn a ni,” tiin an thil neihte chu an hmun theuhah mipuite rawngbawl nana hman tur a nih thu a sawi.

YMA Inkhawmpui Lian 2025-a Sakawrdai a neih chuan YMA kumpuan atan ‘Ruihhlo Do’ an thlan thu sawiin CYMA President chuan, “Hemi bawhzui hian hma pawh nasa takin kan la, kan la zel ang. Ruihhlo do turin Central YMA level-ah Central Anti Drugs Squad (CADS) dinin anni hian mutmu pawh tuah mumal hman lo leh chawh pawh a hun taka ei thei lovin theihțawp chhuahin ruihhlo do hna hi an kalpui mek a ni. Hemi bakah Aizawl khawpui bik chu hmun 10 (Zone-10) ah inthenin hengah kan CEC leh Branch hruaitute hruaina in Zone Anti Drugs Squad (ZADS) ten tlaivarin ruihhlo do hna hi an thawk,” a ti.

CYMA President chuan an hmalaknaah ruihhlo pawh an man tamin ruihhlo zuartute pawh an um chep hle tih sawiin, “Hetiang bawk hian kan Sub-Hqrs. YMA, Group YMA leh Branch YMA te pawhin ruihhlo hi an do mek bawk a ni. Kan thalaite tibuaitu ruihhlo leh a zuartute do kawnga hma kan laknaah a lawmawm tak zet a, mahse inthlahdah thei kan ni lo,” tiin insangmar zel turin YMA hruaitute a sawm.

Ruihhlo zuartute hi kan chhungkua, khawtlang leh ram hmelma an nih thu sawiin R Lalngheta chuan, “Heng mite hi a tawp rat thleng umzui ila, an lakah hian tlawm thei kan ni lo. Hnehna kan chan ngei theih nan theihțawp i chhuah zel ang u,” a ti.