Yoga Day hman a ni

Khawvel hmun dangte rualin tukin (21.6.2026) khan 12th International Day of Yoga chu, “Yoga for Healthy Ageing” tih thupui hmangin 34 Assam Rifles Helipad, Zokhawsangah lawm a ni. National AYUSH Mission, Directorate of AYUSH bultuma hun hman hi Larsap Gen. Vijay Kumar Singh chuan khuallian niin a hmanpui a, Health & Family Welfare Minister alrinpuii chu khualzahawm a ni.

He ni puala kalkhawmte hmaa thu a sawiah Larsapchuan Prime Minister Narendra Modi hmalaknain Yoga chu khawvel pum hriat hlawh leh ngaihven a nih thu sawiin, khawvel puma hman theih tura UNO-in a pawmpuiatanga kum 12-na hmel International Day of Yoga-in a hmu ta chu lawmawm a tih thu a sawi a, “Yoga hi taksa, rilru leh ngaihtuahnate tha taka thlunzawma hriselna tha thlentu a ni. Yoga exercise hrang hrangte chuan taksa leh rilru hrisel nan tinzawn leh hnathawh dan bik an neih hran theuh a, tangkai taka hman a nih theih nan tih dan dik common yoga protocol zawm a tul,” a ti.

Larsap chuan yoga awmzia leh tih dan dikte sawiin, “Yoga chu thlan tih tlak nana ruahman a nih lo a, taksa leh rilru lamte inrem taka siamtu a ni. Hun tam aiin tih dan phung dik a mamawh zawk. Taksa tih chet vak vak lam a kawk loa, boruak hip luh leh thawk chhuah mil zela chet lak a pawimawh a, tih dan hrang hrangte hi natna bik ti dam thei tura duan a ni,” tiin Yoga chu exercise awlsam leh hmanraw mamawh tlem a nih avanga mitin banphak a nih thu a sawi.

Health Minister Lalrinpuii pawhin thu sawiin, “khawvel hmun dangte ruala Mizoramin khawvel pum huap hriselna lam hawi hmalakna lian leh pawimawh tak International Day of Yoga puala hun hman a ni hi a lawmawm. Yoga chuan nitin khawsak buai leh hah tak karah mihringte muanna leh rilru fim a pe. Taksa leh rilru sawizawina awlsam leh mitin tana tih theih a ni,” a ti.

International Yoga Day 2026 lawmnaah hian Col Laldinpuia, Commandant, 34 Assam Rifles chuan kalkhawmte lawmna thu a sawi. Yoga Crew, National AYUSH Mission-te kaihhruaiin yoga tih dan tur dik “Common Yoga Protocol” tarlan angin yoga exercise chi hrang hrang hmangin kalkhawmten taksa leh rilru sawizawina hun an hmang. He hunah hian Assam Rifles, Mizo Air Sqn. NCC leh sawrkar official pawimawhte tiamin mi 300 vel an tel a ni.