Youth Exchange Programme-ah Zoramthanga’n thu a sawi

Nimin (27.1.2026) khan Mizoram University Guest House Conference Hall-ah Ministry of Development of North Eastern Region (MDoNER) leh North Eastern Council (NEC) bultuma programme pawimawh tak, “Ek Bharat Shreshtha Bharat” campaign – Ashtalakshmi Darshan Youth Exchange Programme-ah Chief Minister hlui Zoramthanga, MNF President chu a bika sawm a nih angin a tel a, thu a sawi.

Youth Exchange hmanpuitu Zoramthanga chuan remna thuthlung avanga Mizoramin a bika humhimna kan neih hrang hrangte leh remna chungchang thu sawiin, “MNF leh India inremna, peace accord hlawhtling tak avanga kan neih Mizoram University hmun ngeiah state pawn aṭanga zirlaite leh zirtirtu duhawm tak takte nen inkawmhona hlu kan neih theih avangin ka lawm hle. Mizoram Peace Accord hi India ram chanchina inremna thuthlung ziah tawha hlawhtling berte zinga mi, vawiin thlenga remna tlo leh tluantling bera chhal ngam, hunin a finfiah tawh, ram dangte pawhin an remna thuthlung atana an entawn a la ni reng a ni,” a ti.

MNF President chuan remna a hlut thu sawiin, “Remna kan neih aṭangin Mizoram pawhin hmasawnna tam tak kan hmu tawh. Pathianin min pek remna hi ṭhangtharte leh chhuan lo la awm zel tur te’n ram hmasawnna nasa zawk an neih zel theih nan hlut nachang hriaa remna humhalhtu kan nih a pawimawh tak zet a ni,” tiin remna tel loa hmasawnna tluantling a hmuh theih loh angin remnain a thlen ṭhin hmasawnna nasa zawk kan ramin a hmuh zel theih nan remna vawng nungtu ni turin zirlaite a chah.

Zirlaite aṭanga zawhna chhangin Chief Minister hlui chuan a tumruhna avanga harsatna a paltlang tawh dan a sawiin, “Mizoram ramri dep thingtlang khuaa piang leh seilian, naupang rethei ve tak, inhlawhfa chawp chunga lehkha zir ngai, zalenna suala rammu tawh kha Mizoram Chief Minister ṭum thum ka nih theihna chhan hi Pathian malsawmna bakah chuan ka tumruhna a ni. Harsatna karah pawh tumruhna nghet tak chuan dinhmun ṭha zawkah min khaichhuak leh mai ṭhin a, tumruhna chuan harsatna min paltlangtir thei ṭhin a ni,” a ti.

January 15-28, 2026 thlenga neih tur Ashtalakshmi Darshan Youth Exchange Programme neih mekah hian Andaman & Nicobar Islands leh Lakshadweep aṭangin zirlai 20 ve ve leh faculty coordinator 2 ve ve, an vaiin mi 44 te chu MZU chuan a mikhual mek a ni.