Youth Icon buatsaih leh dawn

Kum 2024-ah hlawhtling taka TV reality show Youth Icon thlanna neih a nih hnuah, kumin 2026-ah zaithiam thlanna hi neih leh a ni dawn.

LPS Vision Production chuan kuminah Youth Icon an buatsaih leh tur chungchang hi vawiin (24.3.2026) ah an puang a, intihsiakna neih hun tur leh a kalphung turte chu la puan chian leh tur a ni.

Kum 2006-a bul an tan zai intihsiakna Youth Icon hi Mizorama reality show buatsaihah chuan a hlawhtling berte zinga chhal a ni a, tum 7 buatsaih a ni tawh a; zaithiam lar tam tak chher chhuah a lo ni tawh.

Kum 2024 khan Youth Icon thlanna neih a ni a, a hlawhtling hle. Youth Icon atana thlan Lalsangliana bakah top 10-a langte chu ram mipui ngaihven rawn an ni a, Icon Fans te thawm pawh a ringin, Mizorama thil thleng ngai lo tam tak chin chhuah a nih phah.

Youth Icon star-te thawm hi a la reh lo mai ni loin Mizo zaimite zinga sawm hlawh ber an la ni reng a, chutiang karah chuan kuminah hian Youth Icon thlanna hi neih leh a ni dawn ta a ni.

Zoramchhani chu Youth Icon atana thlan hmasak ber a ni a, kum 2007-ah Malsawmtluangi, 2009-ah R. Lalhmangaiha, 2012-ah Lalrempuia, 2016-ah K. Lalthlamuankimi, 2019-ah Zothanpuii leh 2024-ah Lalsangliana te Youth Icon atan thlan an lo ni tawh.