Zam loin kan kal zel dawn &#8211; Zoramthanga

MNF President Zoramthanga chuan an party chu zam loa an kal zel dawn thu leh ZPM chu AMC-ah chuan mipui ngaihah nula thianghlim ang an la nih thu a sawi.

MNF-in vawiin (4.6.2026) a an party office-a chhung inkhawm an hmanaah thu sawiin Zoramthanga chuan, “MNF-te chuan sakawr chakna kan ring ve ngai loa, tawlailir kan chhuang ngai hek lo. A rawngbawl tur leh chanchin tha hril tura Pathian din a ni. Kum 60 chuang min hruai tawhtu Pathianin kan chak lohna chu kan inzir nan leh kan inenfiah nan min hmansak zawk thin. MNF min vawrh kang turin hun kal tawhah zirlai min zirtir chang a nei thin. Ram leh mipui ngaihsakna kan neihte hi Pathianin kan felnaah min ruatsak a, zam loin kan kal zel dawn a ni,” a ti.

MNF President chuan AMC-ah MNF-in thil thaa bul tanin, danglam tha zawk a siam tih sawiin, “Chu chuan harsatna a siam thei. Chu chu a tha lo zawngin MNF-ah min burbun a, kan tawrh phah ta a ni. AMC-a ni khat pawh la sorkar ve ngai lo ZPM chu mipui ngaihah chuan nula thianghlim ang an ni. Aizawl bial zawng zawng hi ZPM bial a ni a, minister bial a ni deuh vek bawk. Inthlan hmasa lamah an lo chak lo fo tawh bawk nen, theihtawp chhuahin engti zawng pawha tlin hrim hrim tumin an bei a, inthlan hun nasa taka pawtseiin mipui rilru hmin an tum. Mipuiin MNF AMC tana sum an release duhlohte kha an hre ve si lo,” tiin ZPM chu an chelh theih tak loh thu a sawi.