News

Vawiin (1.8.2026) chhun khan Lunglei West Bialtu MLA T. Lalhlimpuia chuan a bial, Lunglei West huam chhunga tun hnaia post graduate exam-a ti ṭha (rank holder)-te hnenah chawimawina leh lawmpuina thilpek hlanin, Tlanglian Academy nen ṭangkawpa Lunglei West bial chhunga ṭhalai hna zawng laite tana online coaching sponsorship kalpui tur a hawng nghal.

Cultural Heritage Centre, Lungleia zirlai ti tha chawimawina leh online coaching sponsorship hawnna hun buatsaihah Lunglei West Bialtu MLA T. Lalhlimpuia chuan tun laiah technology leh thiamnaah khawvel a sang tawhin, zirlaite ban phakah eng kim a awm tawh tih sawiin, “Zir tur mahnia inhai kuak theih a tam tawh hle, Zirlaite mamawh chu kaihhruaina ṭha a ni. Kan tuipui leh vei zawng kan mutpui a, kan mut dawna kan thil tih ṭhinin kan hlawhtlin leh hlawhtlin loh a hril thui hle,” tiin zirna kawngah leh hna thawhnaah hlawhtlinna tluantling chang thei turin ril ṭamin ei tur a zawng anga thiamna zawng a, zirna chu ṭamchhawl anga anmahni turtu atan hmang turin zirlaite leh ṭhalaite a fuih.

Lunglei West MLA sponsored-a Tlanglian Academy hnuaia MCS (Combined Competitive) Examination Prelims Online Coaching zawm tur mi 31 te hming puan chhuah niin, MLA T. Lalhlimpuia leh Tlanglian Academy ai awhte nen inchibaina leh thla lak hona hun hman a ni. Online coaching hi August 2026 aṭangin thla li chhung kalpui phawt tura ruahman a ni.