News

Department of Information & Public Relations, Printing & Stationery (IPRP&S) chuan a school text book sem chhuah chungchangah a hnuaia tarlan ang hian thuchhuah an siam a, school tan hmain zirlai bu peihfel hman a nih thu an tarlang.

AN THUCHHUAH

Academic Session 2026–2027 atana State Council of Educational Research and Training (SCERT)-in a buatsaih school textbook-te siam leh sem chhuah hna chu a hun takah zawh fel a ni. SCERT school textbook siam hna hi Department of Information & Public Relations, Printing & Stationery (IPRP&S) hnuia Directorate of Printing & Stationery kuta awm niin, a ngaihven leh a tihhlawhtlin hna tha takin a hlen chhuak a ni.

He hmalakna hi school textbook quality siamthatna kawngah hmalakna thar pawimawh tak a niin textbook cover lamination pawh tih tel chhoh a ni ta. Hei hi a hmaa tih ngai loh a ni a, a hma aiin a senso sang deuh mah se, zirlaite tana hman tlak leh deih rei zawk tur a a nih avangin; a tangkai hle a ni.

Academic Session 2026–2027 atan textbook print order hi SCERT atangin 2025 kum tawp lamah dawn a ni. Soft copy final chu 2026 kum tîr lamah peih fel a ni. Hetih lai hian academic session hun hi April thla atangin March 23-ah sawn a nih tak avangin, school tan hma ngeia textbook-te siam zawh hman a tul hle.

Academic session sawn hma a nih tak avang hian school textbook a hma lama peihfel tumin Directorate of Printing & Stationery chuan hmalakna chak tak in a la. Hun chep tak karah dummy copy siam, proof reading, correction leh a tul dangte rang taka thawk nghalin, textbook print, binding leh lamination hna zawng zawng chu session tan hma ngeiin an zo fel ta a ni.

Academic session tan hmain textbook-te hi Samagra leh textbook dealer-te hnenah hlan nghal vek a ni a, fistrict zawng zawnga zirlaite hnenah sem a nih theih nan Mizoram chhunga district tinah heng zirlaibute hi thlen hman vek a ni.