Nov 26, 2025
Wednesday
LADC inthlan lo awm tur atan MNF Treasurer Lalruatkima chuan vawiin (26.11.2025) hian Lawngtlai East Bial khaw hrang hrangah a campaign-a, MNF chu an lungrual thu leh ZPM-ah mipuite an beidawn thu a sawi.
MNF Treasurer chuan MNF chu tlang tin hmun tinah an lungrual em em nia sawiin, “He kan lungrualna hi Pathianin mal a sawm a, mipuite thinlung a hneh a, inthlan kan hmachhawn chhohah kan chak ta zawt zawt mai a ni. Tun LADC inthlanah pawh hian sorkar nghet siam turin kan tlin leh ngei kan ring nghet tlat a ni,” a ti.
MNF Treasurer chuan, ZPM sorkar chuan an intiamna zawng zawng deuh thaw an tihlawh tling lo nia sawiin, “Kan ti lo ang, an tih an ti nasa em em. Chhiah leh thil man hrang hrang tisangin mipuite min hrek rilṭam mek a, min sawrfu mek zel a ni,” tiin ZPM-in Zoram an hruai danah mipuite an beidawn thu a sawi.
Tun thlengin LADC sorkar hnathawk hlawh tur ZPM sorkarin a la pe lo nia sawiin Lalruatkima chuan, “Pawi kan ti hle. Sorkar hnathawkin pangngai taka hlawh an lak hi an chanvo a ni,” a ti.
