Jul 27, 2026
Monday
Vawiin hian MPCC chuan an officia-ah political session an hmang a, thusawitu MPCC General Secretary Rosiamngheta chuan, “He ram tan hian Mizo Kristian Nationalist kan ni tur a ni. Politics hi pawisa zawn nana hmang tawh loin, kan ram, kan hnam, kan sakhua humhim nan kan hmang tur a ni,” a ti.
Rosiamngheta chuan hnam anga kan dinchhuahna turin tunlai politics inher rem mekah hian theihtawp kan chhuah a ngaih thu sawiin, “Mizo hi kan hnam leh kan sakhua Kristianna nena kan dinchhuah a tul, politics hi tangka leh rangkachak zawnna ah i ngai lo ang u, hnam leh ram damchhuah nan a ni tih i hrefiah ang u,” tiin thinlung taka kan hnam leh sakhua damchhuah nan politics khel turin a sawm.
MPCC GS chuan BJP Sorkarin Kristiante hi min nuai mek tih sawiin, “Chanchintha in mawhphurna min pe, khawiah mah Kristiante hian Hindu leh Mosolman-te bungrua hi kan suasam ve ngai lo. Chutichung chuan thang min la kam hnan duh a nih chu. Chuvangin hma ila ang u. Chanchintha hril hi dan bawhchhiatna a ni lo. He ram tan hian Mizo Kristian Nationalist kan ni tur a ni. Politics hi pawisa zawn nana hmang tawh loin, kan ram, kan hnam, sakhua humhim nan kan hmang tur a ni.,” a ti.
Risamngheta chuan party zawng zawngah harsatna nei lo an awm lo tih sawiin, “Unau chhulkhat kual thawnthu sawimah a hrang a, chhul hrang thiau han kalkhawm hi kan thu hmun vek lo. Kan vantlang ram leh hnam, sakhua him leh hmasawnna kan duh avangin kan thawkho mai a ni. Party ang zawng chuan ZPM an buai ber a, MNF in an dawt a, Congress kan lungrual ber tih hi Zoram mipuiten min hriatpui rawh u. Congress chu kan philosophy avangin kan kalkhawm,” tiin party dang chu dinhmun avangin an buai mek thu a sawi.
