News

MNF chuan vawiin (24.11.2025) chhun khan an office-ah political session an hmang a, thusawitu MNF Vice President Lalchhandama Ralte, Leader of Opposition chuan Chief Minister Lalduhoma chuan Lungleia press mite hmaa dawt tam tak sawiah puhin, ZPM chu an chiai niin a sawi.

Lalchhandama Ralte chuan November 20, 2025 khan Mizoram Assembly tihbawrhbanna a thleng tih sawiin, ‘Mizoram State University dinna tur chungchangah Chief Minister-in Lunglei press mite hmaah dawt tam tak a sawi. NEP 2020 chu India ram zirna hmasawnna tur, state zawng zawngte zawm tur ni a, hemi avang hian Mizorama zirna inte thiamna leh certificate petu tur State University din a lo tul ta. MNF Sorkarah khan State University chungchang Cabinet chuan July 31, 2023 khan kan rel a, August 16, 2025-ah Bill Drafting Committee din a ni,” a ti.

ZPM Sorkar thar chuan drafting committee hma a laktir tih sawiin MNF Vice President chuan, “March 4, 2025-ah bill chu pass a ni ta. MNF Ministry kha draft stage-ah kan awm a, a hmun tur engmah a la awm lo. A hmunhma dahtu dik tak chu anmahni (ZPM sorkar) an ni a, Aizawl-a dah tur an ti. Kan Chief Minister tih vek a ni a, heti lam (Aizawl)-ah ‘kan tih’ a ti a, sawti lam (Lunglei)-ah MNF tih a ti thung. Cluster institution-te kha MNF Sorkar thlan tiin a sawi,” tiin cluster college/institute order chu October 10, 2025 khan a chhuak chauh thu a sawi.

MNF Vice President chuan CM-in chawpchilhin dawt a sawi hnem lutuk nia sawiin, “H&TE Minister hovin chak takin hma an la a, college an notify pawh minister-in a tlawh vek tawh. November 20, 2025-a Lungleia University dah tur tih a puan lai khan Aizawla university hmunhma tura ruatah an la hnatlang luih luih a ni. MNF tih vek, titu hian chhim lam tan MNF-in engmah ti duh lo angin a sawi. Amah zawkin dawt chiang tak a sawi a ni. H&TE Minister pawhin Lungleia state university a dah theih loh dan a sawi chu – inkalpawh zung zung a ngai, college panga neih a ngai, Lungleiah pahnih chauh a awm tihte a ni,” a ti.

ZPM chuan Lunglei lamin an dil laiin ‘a theih loh’ an tih thu sawiin Lalchhandama Ralte chuan, “Tunah a chhia zawng zawng hi engatinge min puh tak le? Dampa biala an tlak avangin mu leh mal an nei loa ngaihtuahna fim an hmang lo, an chiai a ni. Assembly House-a university bill kan sawi khan an MLA paliten Lungleia dah an dil miah lo, Aizawla dah an thlawp thu leh MZSU Bill (Aizawl station) pass-tu nih an inchhuan thute an sawi. Lungleiah awm rawh se titu kha Opposition bench zawk kan ni,” tiin ZPM MLA pakhatmah khan Lungleia dah an sawi loh thu a sawi.