ZPM-in AMC inthlan an huphurh &#8211; Lalrinenga Sailo

Vawiin (2.2.2026) hian MNF chuan an office-ah chhung inkhawm an hmang a, thusawitu Aizawl Mayor Lalrinenga Sailo chuan ZPM-in AMC inthlan an huphurh thu a sawi.

Lalrinenga Sailo chuan ZPM sorkar enchhin duhin mipuiin an thlang tlin thu sawiin, “Kum khat an sorkar hnu maiah inthlanna hrang hrangah ZPM hian chakna an chang zui ta meuh lo. Village Council leh Local Council inthlan kha phur takin a hun hmain an kalpui lui a, chutah pawh chuan an beisei an pha lo nasa hle. Tun hnaiah LADC inthlanah ruling party ZPM chu an chak lo leh hle a, hengte avang hian AMC inthlan pawh hi an huphurh a, an tikhawtlai ta rih niin a ngaih theih a ni,” a ti.

Aizawl Mayor chuan Aizawl khawpui hi chak zawka hma a sawn theihna turin MNF enkawl sorkar chuan Municipal Act 2008 siamin Aizawl khawpuiah municipal hi din a nih thu sawiin, “Chuvangin, AMC chungchangah hi chuan MNF hian neitu nihna kan nei. Aizawl khawpui hmasawnna tura hmalakna kawngah Aizawl khawpui mawina leh hmasawnna turahi kan dah hmasa fo a ni. Finance Commission atanga sum kan dawn state sorkar atanga tihkhawtlai ni mah se theih tawpa hmasawnna hrang hrang kan thawk a, chung zing langsar zual te chu – 1. AMC Multi Complex, Tuikual ,2. AMC Plaza, Bawngkawn, 3. City Bus Terminal, Zemabawk, 4. AMC Sport Complex, Brigade Field, 5. AMC Eco-park, Luangmual, 6. AMC Eco-Park Reiek, etc an ni,” tiin AMC hmalakna tha tak avangin cheng vbc. 55 zet an dawng a, sum hi a tamtham avangin UD&PA kutah a luh thu a sawi.