News

ZPM chuan vawiin (21.11.2025) chhun khan Aeropagi, Lawngtlaiah Lai Autonomous District Council (LADC) inthlan lo awm tur atan campaign an kick-off a, thusawitu Chief Minister Lalduhoma chuan an sorkar veleh Central Bureau of Investigation (CBI) hnenah general consent an pek thu sawiin, Lairam mipuite chu ngaihtuahna fim tak hmang turin a chah.

Chief Minister chuan kum 5 dang lo awm leh tur pawh Pathian leh mipuite zarah an sorkar leh ngei an inbeisei tih sawiin, “District council-ah sorkarna kan siam chuan district council leh sorkar malsawmna dawng turin Lai ram mipuite rilru siam turin ka chah duh che u. Lai ram hian hmangaihtu dik a mamawh a, chumi atan chuan ZPM hian mi tha ni a kan hriat te kan rawn chhawp chhuak. Sorkarin hmasawnna kawng a zawh zel a, hmasawnna tur hmachhhawp leh thawh mek tam tak a awm. Chhim lam hi ZPM-in a ngaihsak em em a, Mizoram pual liau liau Lunglei-ah University kan din dawn a ni. Hmasawnna hrang hrang hnathawh awm turah district council hruaitute an pawimawh dawn a, state sorkar nen tha taka thawk thei thlang turin Lai mipuite rilru fim pu turin ka ngen che u a ni,” a ti.

Mipui sorkar a nih angin kohhran leh tlawmngai pawl hrang hrangte nen an thawk tlang zel tih sawiin Lalduhoma chuan, “Kan han sorkar a, sorkar hnathawkte harsatna thin thla bi hlawh tha takin kan pe nghal a, an DA te kan tipung a, GPF awlsam takin an la thei tawh . Ruang phurh chungchanga mipuite buai ngai tawh lovin sorkarin mawhphurhna kan la a, health care tha tak mai MUHCS kan nei ta. Kan sorkar a, CBI-te consent kan pe nghal a, hei hian eirukna chung changah nasa takin nghawng a neiin kan hria a, tun thlengin kan hotute zingah eiruknaa hminghliau tumah kan la awm lo niin kan hria,” tiin Mizoram chu India rama eiruk tlemnaah pahnihna a nih tak thu a sawi.