ZPM-in CBI-ah FIR thehlut leh dawn lo

ZPM Media Chairman B Lalchhanzova, Revenue Minister chuan Lengpui leh Sihphir ram Indian Air Force (IAF) hnena hralh/hlan chungchangah FIR an thehluh leh dawn loh thu a sawi.

ZPM Media Chairman hian vawiin (6.2.2026) hian an office-ah press conference koin, ni 4.2.2026 a Council of Minister thutkhawm zawhah IAF hnena ram hralh chungchang an sawiho thu sawiin, “Kan CM-in sorkar laiin FIR thehluh chu a kawng hmang lo viau na a, MNF leh Congress chet an tum loh vangin thehluh mai nise a ti. Revenue Minister hminga thehluh nise tih a ni a, Legal lam kan rawn hnuah minister hminga thehluh chu rem loa ngaih a nih vangin Media Chairman ka nihna anga thehlut turin thutlukna kan siam a, kan inbuatsaih nghal. Vawiin tlai dar 2 a thehlut turin kan inpeih vek tawh,” a ti.

MNF leh Congress lamin ZPM-in FIR thehluh an tum thawm an hriat vangin an che chawp chung chung nia sawiin B Lalchhanzova chuan, “MNF-in kalhmang lo deuha CVO hnena an thehluh kha chuan thehluh kan la tum tho. Congress-in CBI hnenah ngei an thehluh tak vangin ZPM PAC chuan thehluh ve lo an rel ta a ni. MNF-in CVO-ah an thehluhah chuan thu tluang pangngai mai niin kan hria, document pawh an thehlut mumal lo,” a ti a, a tul a nih chuan Zoram mipui sutthlek enin an la thehluh mai theih thu a sawi.

ZPM Media Chairman chuan CBI-in consent an dil chuan Mizoram Sorkar chuan a pek ngei tur thu sawiin, “Dan dik lo taka mantang ei an awm chuan hremna hmu ngei se kan duh. Mi dik lo chu tumah zuah ngai kan ti lo. Beisei anga thil a kal ta lo a nih chuan hmala turin kan inpeih reng. He thilah hian hma kan lak tur thu CM hrilhin, a kut a fai leh fai loh ka zawta CM chuan ‘ka kut a fai e, hmala rawh u’ tiin min chhang a ni,” a ti.