News

ZPM chuan thuchhuah siamin, MPCC-in February 6, 2026-a political session Congress Bhavan-a an neihahZodintluanga chuan thu a sawi a, Lalduhoma’n Chawlhhmuna a inhmunah in a sak mek thu sawiin; Mizoramin Chief Minister a neih tawh zinga corrupt berah a puh ta mai niin an tarlang.

Hetiang thu innghahna nei lo hmanga kan Chief Minister duh tak mipui hmaa sawi bawrhban tumna hi an ngai thu tak hle tih tarlangin ZPM chuan, “Kan politician senior-in ram rawng a bawlpui dawt ngialngan taka a puh hi pawi kan ti hle a ni. Kan CM hi PA to Chief Minister te, Indian Police Service (IPS) te, Lok Sabha-ah Member of Parliement (MP) te lo ni tawh a ni. MLA-ah pawh vawi 5 thlan tlin a ni tawh. Heng aṭanga a sum lakluh hian in leh lo din ve thei tur chu a ni hrim hrim a ni. Hei bakah hian a in sak nan hian loan vawi 4 a la tawh. Chu chu vawiin thleng hian thla tin hian a la rul ve reng,” an ti.

ZPM chuan Lalduhoma hi politics-a a zuan luh aṭanga vawin thleng hian dawta puh a ni fo ṭhin tih tarlangin, “Kan ram politician-te zingah hian amah tluka beihrawn tawk hi an la awm ngai lo. Rambuai laiin kawktu-ah a tang tih te, a pa-in a tuithlar a, anchhia a lawh tih te, a nu ruang a kil ve pawh an phalsak lo tih te, sawn a thlak tih te, zu ngawl a vei tih te, UPC Biak In a chhuhsak tih te, a nula tawmpui lai JAC-ten an man tih te leh tualthattu ni hiala puh te a lo tawng tawh ṭhin. Heng an puhchhiatna zawng zawngah hian chuan, ‘Pathianin phuba lak a phal lo, phuba chu keima lak tur a ni Pathianin a ti’ a ti mai ṭhin,” tiin Lalduhoma chu MZP ten Mizoram politician-te zinga eirukna laka fihlim berah puangin, chawimawina an lo hlan tawh tih an tarlang.