ZPM-in hmeichhiate kan ngai pawimawh

ZPM AMC Area Zonu chuan vawiin (12.12.2025) chhun khan Vanapa Hall-ah conference an hmang a, an hun hmanpuitu Chief Minister Lalduhoma chuan ZPM chuan hmeichhiate an ngaih pawimawh thu leh Mizote pian pun kan ngaih thu a sawi.

Lalduhoma chuan, “ZPM hian hmeichhiate kan ngai pawimawh a, gender budget kan siam a, hmeichhe puala budget dah hmasa ber kan ni. Village Council leh Local Council-ah ZPM aṭangin hmeichhe candidate ṭhahnem tak an tling a, eng emaw zat chu chairman/president an ni. Heng hmeichhe chhuanawm tak tak te hi kan party headquarters chuan lawmpuina thuchei a hlan a ni. Lunglei Municipal Council-ah ZPM kan solid a, reserve seat 4 bakah general seat 2 hmeichhiaten an luah mek. Aizawl Municipal Corporation-ah ZPM-in reserve seat 5 kan luah. ZPM sorkar chu hmeichhe Cabinet Minister nei hmasa ber kan ni a, hmeichhe MLA nei tam ber pawh kan ni,” a ti.

Kan ramah hian luah loh, hman ṭangkai loh ram ruak a tam thu sawiin Chief Minister chuan, “A hmang ṭangkai tur mihring kan mamawh, pian pun kan ngai a, nupa kara nau piang kan tam a ngai. Hmeichhia 1,000 zelah mipa 1,066 kan awm a, mipa kan piang tlem a ni lo a, kan thi nasa. Ruihhlo vang a ni. Mipa puitling kan tlem chuan kawng hrang hrangin assimilation a thlen thei. Office leh sumdawnna hmunah hmeichhia an tam zawk a, hmeichhe thawh loh tur nia kan ngaih thlengin an thawk,” tiin exam hrang hrangah hmeichhiate chu a ti ṭha zawk an ni deuh zel thu a sawi.

Zonu conference hi an president R Lalawmpuii, Corporator-in kaihruaiin, Minister of State B Lalchhanzova leh ZPM Thalai President Jeje Lalpekhlua, MLA te pawhin an hmanpui.