News

ZPM chuan thuchhuah siamin, vawiina Mizoram aiawh Rajya Sabha Member of Parliament thlanna tluang taka neih a ni lawmawm an tih thu tarlangin, “Mizoram Legislative Assembly member 40 awmnaah Member 36-in vote an thlâk a, vote thlak lo pali (awmin, ZPM Party Rajya Sabha MP candidate Pu K. Laltluangkima’n vote 26 hmuin hneh taka thlan tlin a ni,” an ti.

Rajya Sabha inthlana ZPM Party MLA vote thlak theiten ZPM official candidate an vote vek thei chu party inlungrualna leh thawhhona ṭhatzia lantirtu a ni tih tarlangin ZPM chuan, “Hetihlai hian damlohna avanga Election Commission-a home voting dil sak Pu W. Chhuanawma erawh phalsak a ni ta lo thung. Politics-a dik lo taka inbeihna atana thu dik lo hmang hreh lotu eptu party pakhatin; ZPM Party MLA-te vote a pelhê tur thu mipui bum tuma an lo aupui chiam erawh a dik lohzia a lang leh ta! Ramhlui ziaa inbum tumna hi sim tawh se kan ti,” tiin mahni mawhphurhna hlena vote thlaktu MLA zawng zawngte an fakawm an tih thu an tarlang.

ZPM chuan BJP MLA pahnih leh Congress MLA pakhatin vote an thlak duh lo nia tarlangin, “Mipui zah lohna leh India dan zah lohna lantirna dik tak a ni. Mipui hnêna vote zawng ṭhin, vote thlak uar tura fuih tur te, khua leh tui ṭha ni tura vote thlak pawimawhna te auchhuahpuitu tur berin vote an thlak duh lo hi khua leh tui ṭha mawhphurhna hlen duh lo mizia dik tak a ni. Mizoram BJP leh MPCC-te hi vote thlak lo tura inthurual tak an lo ni,” an ti.