ZPM-in leiba thangah min tantir &#8211; Dr. Lallianchhunga

MPCC chuan vawiin (19.6.2026) hian an office-ah chhung inkhawm an hmang a, MPCC Spokeserson Dr. Lallianchhunga, GS in thu a sawi.

Mizoram leiba chungchang sawiin, MPCC Spokesperson chuan, “Kum 2023 inthlan hma kha chuan ZPM hi sorkar sum leh pai enkawl thiam tur, a tlaran zawnga khawsa duh lo turin mipuiin an ngai. Mah se, an sorkar hnua an khawsak dan erawh leiba tipung nasa tur zawngin, a tlaran zawngin an khawsa. State kan nih hnuah kan budget aiin kan leiba a tam phah ta hial a; kumin 2026-2027 Mizoram budget chu cheng vbc. 17,076.92 a nih laiin, kan leiba chu cheng vbc. 19,085.15 a ni dawn a ni. Mizoram chu leiba thangah (debt trap) min tantir a ni ringawt. Sorkar leh tur tan pawh buaipui tham leiba ZPM Sorkar hian a hnutchhiah hman dawn a, ZPM kan enchhin hi a pawi hle a ni,” a ti.

Dr. Lallianchhunga chuan, “Mizo App hman tur tia taxi ho an tukluih pawh hi engdang ni loin, mipuite atanga chhiah (tax) an khawnna hmanrua tur a ni. India ram khawpui lian UBER leh OLA hmannaah Taxi neitute’n registration fee cheng khatmah an chawi loh laiin, Mizoramah chuan registration fee Rs.500 an chawi dawn. Taxi hmangtute’n chhiah an pekna tur atana Mizo App hi siam a ni ber,” tiin ZPM chuan mipuite hi rawk dan chikima min rawk an tum ni bera a lan thu a sawi.

MPCC Spokesperson sawi danin, remna leh muanna kan neih theih nan June 25, 1986 ah Congress Vice President Arjun Singh leh Laldengaten Mizorama sorkar lailawk (interim government) din dan tur Inremna an siam hmasa a, Laldenga chu Mizoram Chief Minister a nihna tur leh Lal Thanhawla chu Dy. Chief Minister a nihna turin hming an ziak a ni. Congress Party leh MNF-te’n inremna an ziah lai hian ‘engtik niah nge sorkar laipui leh MNF-te an inrem ang?’ tih tumahin an la hre lo. An inrem huna harsatna a awm loh nan Lal Thanhawla’n CM lalṭhutthleng a kenna tur an lo tifel hmasa vek. Pathian pawhin mal a sawm a, Mizorama CM awm tawh zingah CM ni rei ber record chelh phain Pathianin a chawisang a ni.

Lal Thanhawla kaihhruai Congress Party pawh Mizorama rorel tawh party zingah ram tana rotling hnutchhiah tha ber an nih theih phah a ni.