News

Nizan (4.11.2025) khan Dampa Bial chhung Kanghmunah MPCC chuan public meeting an buatsaih a, thusawitu MPCC Adviser Zodintluanga chuan ZPM leh MNF chu kal ngaihna hre tawh loah puhin, Mizo thalaite’n fiamthu thawh nana an hman ṭhinin kan Chief Minister a rawn nuihzat ve tawh niin a sawi.

Zodintluanga chuan inthlan dawnah reng reng inthlan hma kar khatah party an zuai tawh chuan a chak theih ngai loh tih sawiin, ‘Vawiin niah hian ZPM leh MNF-te hi en teh u, kal ngaihna an hre tawh lo. Niminah pawh helai khuaah (Kanghmun), an Minister chhuanvawr ber a lo kal a, public meeting pawh nei mumal thei loin a tlan haw a nih kha. MNF lah an party chhungah buaina a awm; news in en chuan Pu Zoramthanga, an party president chu Lungsenah, tute nge, khawi khua a mi te nge tih pawh hriat loh, a lemin mi a va lawmlut daih. Dampa Bialah hian chak tak tak duh sela, Dr.Thangtea hi tling turin duh se la, a rawn campaign ang chu mawle. Engatinge hmun dangah a kal daih, nge an candidate hian kal lo turin a duh zawk nge?’ a ti.

Mizorama political party lian deuh chu an sorkar vek tawh tih sawiin MPCC Adviser chuan, ‘Chung sorkar awm tawhah chuan kum 2 chhung leka mipuiin an nin em em sorkar awmchhun chu vawiin nia kan sawrkar hrawn mek hi a ni. Chanchintharah Pu Zoramthanga thusawi a lo lang a, Pu Zoramthanga pawhin ‘dawt sawi nasa lutuk’ a ti a nih chuan tuna kan Chief Minister hian dawt a sawi nasa ngawt ang. Zoram mipuiin Pu Zoramthanga chu mahni thutiama ding lo, mumang rama cheng niin an hmu a; kawng chhawng min tiam a, Aizawl hi Traffic Jam awm lohna khawpuia siam a tiam,’ tiin Mizo thalaite’n fiamthu thawh nana an hman ṭhin khan vawiin nia kan Chief Minister hi a rawn nuihzat ve tawh thu a sawi.