ZPM Sorkar a nghing dul dul &#8211; Zoramthanga

MNF President Zoramthanga chuan ZPM Sorkar chu an nghing dul dul thu leh MNF chu sorkar leh mai tura mipui beisei mek a nih thu a sawi.

Zoramthanga hi LADC inthlan lo awm tur atana campaign-in khaw hrang hrang a tlawh a, Dampa Bial bye-election neih zawh takah pawh Chief Minister Lalduhoma hoa thapui chhuahin ‘ZPM candidate vote duh lo chuan Lalduhoma in duh lo tel tihna a ni’ tih te leh, ‘ZPM Candidate in vote chuan ZPM Policy leh sorkar in vote tihna a ni’ ti tein inzuar nasa hle tih sawiin, “Mah se, Dampa Bial mipuite’n ZPM Sorkar chu an hnawl,” a ti.

ZPM chu Dampa Bialah leh tunhnaia inthlanna apiangah mipuiin an buk tling zo tawh tih sawiin MNF President chuan, “Paihthlak an ni ta zel a ni. CM khawnbawl Adviser-te meuh pawhin banna an thehlut a, ZPM Sorkar chu a nghinin an nghing dul dul tawh. MNF chu ‘Pathian leh kan ram tan’ tih thuthlunga neitu kan nih avangin Pathianin harsatna tinreng karah pawh MNF chu a tungding leh ṭhin,’ tiin MNF chu political party ruhrel lian ber, sorkar leh mai tura ram mipuite beisei mek an nih thu a sawi.