ZPM Thalaiin ACB-ah FIR an thehlut

ZPM Thalai chuan vawiin (6.8.2026) hian Economics & Statistics Directorate Building, MINECO sak a nih dan chungchangah corruption a awm ngei nia kan hriat avangin, Anti Corruption Bureau (ACB) ah corruption complaint/FIR an thehlut.

ZPM Thalai tarlan danin, July 7, 2026 a an vice president Isaac Lallungawia Rokhum-in Aizawl Press Club-a press conference a neihnaa a sawi ang khan, Economics and Statistics building hi 2014 a Congress Sawrkar laia Robert Romawia Royte Firm NECS sak a ni a, 2021-a MNF Sawrkar lai khan a building hnuai lam hi sak chhunzawm leh tura rawtna a awm avangin May 19, 2022 khan PWD, Quality Control, Research and Development Sub Division-1 chuan Inspection a nei a, a building structure hi a nih dan tur M20 grade aia hniam, M10 grade aia hniam vek a nih avangin sak chhunzawm chi ah an ngai lo. Hetih lai hian he building satu MLA Robert Romawia Royte hi MNF Sawrkar-ah minister ni lo se chu MNF Sawrkar khan corruption case an siam sak hial an ring.

Heng PWD Quality Control lamin an thil hmuhchhuah hi June 6, 2022 khan, khatih laia PWD E-in-C Bowman-a khan Director, Economics & Statistic leh Director, Disater Management chu a hriattir a, March 27, 2023 khan Aizawl DC pawhin Joint Inspection nei turin notice a chhuah. April 6, 2023 khan joint inspection neih niin he building hi a him lo hle a ni tih joint inspection report-ah an tarlang. Kum 2023, MNF Sawrkar lai vêk khan, Accountant General-in audit a kalpuinaah he building chungchangah hian Mizoram Procurement Rules bawhchhiatna engemaw zat a hmu chhuak a, he building sak a nih laia Congress Sawrkar leh NECS-te’n hna an in pek danah rules an bawhchhia tih a chiang hle a, Accountant General hian he building sak hna pawh hi a nih tur ang tling pha lo tiin, NECS pawh insawifiah turin a ti a, a insawifiah loh chuan audit pawh hi kaltlangpui a tum loh thu an hmu a ni.

He building sak chungchang hi keini an ngaimawhin thil felhlel awm nia lang te hi an ngai thutak hle tih tarlangin ZPM Thalai chuan, “Mizoram State Project Monitoring Committee te’n, inspection an nei dawn tih kan hriat pawh khan kan lo ngaichang reng a ni. June 9, 2026 ah Mizoram State Project Monitoring Committee chuan Inspection neiin, he building satu NECS hian dân tam tak a bawhchhe ngei niin report a pe a, action la turin sawrkar pawh a ngen hial a ni,” an ti.

ZPM Thalai chuan Economics & Statistics Building chungchangah hian PWD, Aizawl DC, Accountant General leh Mizoram State Project Monitoring Committee ten thil fel lo, dik lo leh him lo an lo hmuhchhuah takah chuan an umzui zel tih tarlangin, “Hetiang hnam ro tling tur heti tak maia suasama a awm hi ngawihbo pui chi ah kan ngai lo. Kan General Secretary Pu Boris Zoremsiama, Vigillance Dept. ZPM Thalai General Headquarters hmingin ACB-ah corruption complaint/FIR kan theh lut ta a ni,” tiin ACB-te’n, he case hi chhuiin, corruption awm angte leh a mawhphurtute lakah hremna pe ngei se an duh tih an tarlang.