ZPM Thalaiin kawng siam an enfiah

Vawiin (9.5.2026) hian ZPM Thalai chuan an president Jeje Lalpekhlua, MLA hoin a tum riatna atan NH-06 Sairang – Kawnpui inkar kawng siam mek a hmunah an enfiah a, tum danga an endik naa NHIDCL, J Infratech Ltd. leh BR Goyal Ltd. ten an hnena intiamna an lo neih tawh, April leh May thla chhunga an chanpual siam zo vek tura an intiamnate pawh an bawhzui zelin an hmu a, furpui hmachhawn zo tura NHIDCL leh ZPM Sawrkar hmalakna lawmawm an ti.

Jeje Lalpekhlua chuan NH-06 Sairang-Kawngpui hi nikum furah sawrkar leh pawl hrang hrangten an buaipui nasa tih sawiin, “ZPM Thalai chuan inspection leh monitoring-te pawh kan mawhphurhnaah dahin, group-a inthenin kartin detailment siamin kan zuk tlawh thina, nikum ngaihtuah chuan tun dinhmunah chuan hmasawnna tam tak kan hmu. Hetianga hmasawnna kan hmuh theih chhanah kan sawrkar hotute, a bikin kan Chief Minister pawhin theihtawp a chhuaha, NHIDCL leh company-te nen sawihonate neiin, vawiina hmasawnna kan hmuh hi ZPM Sawrkarin chak taka a nawr vang niin kan ngai a ni,” a ti.

ZPM Thalai President chuan hna hi thawh zawh a la ni loa, 80% vel tawh zawh tawh a nih thu sawiin, “Hmabak la awmte pawh rei lote chhunga thawh zawh beisei a ni. Vawiina kan dinhmun atang chuan nikum fura harsatna kan tawh angte tawk tawh lo turin kan in ngaia, kan dan zawh loh khuarel chhiatna a thleng te a nih ngawt loh chuan,” tiin motor lian tangte pawh a awm tawh loh an beisei thu a sawi.

ZPM Thalai hruaitute chuan helai kawng enkawltu NHIDCL hnuaia Company pahnih J Infratech Ltd. leh BR Goyal Ltd. te an tlawh nghala, an hna hmachhawpte zawhfiah nghal niin, Buichali leh Sairang inkar enkawltu J Infratech te chuan ni 15-20 thawh tur hna an la neihthu an sawi. Buichali Lei leh Sairang inkar chu May 12, 2026 (Monday) atangin resurfacing leh pads repair an chhunzawm dawna, harsatna an tawk a nih loh chuan ni 15-20 chhungin an hnate an zawhfel theih tur thu an sawi a ni.

Buichali Lei leh Mualkhang Inkar enkawltu BR Goyal Ltd. chuan an hna chanpual chu an zawh tawh thu leh NHIDCL lamin inspection pawh an neih tawh thu an sawia, a leilung zir loh vanga a tlo lai tur awm angte NHIDCL-ah report pein, helai kawnga an chanpual chu zo fel tawhah an inngaih thu report an lo pe bawk a ni.