Feb 17, 2026
Tuesday
Sairang Branch YMA Kumpuan Sub-Committee chuan an ram chhung, kawngthlang mi huan (ramhnuaiah) leh kawng sir hnim karah zu (a senchi) thahnem tak nimin (16.2.2026) chhun leh zan khan an man.
An thudawn bawhzuiin Sairang YMA-te hian nimin chhun khan ramhnuaiah hian Royal Stag case 54 (um 624) an man. Zu hi hnim kar kawng sira thuhruk a ni.
Zan dar 8:30 velah phone call an dawn bawhzuiin ramhnuai an dap leh a, Royal Stag bawk case (um 288) hmu chhuakin an man leh. YMA office an sawiho hnuah ramhnuai hi zau zawka dap lehin Royal Stag tho case (um 228) hmu chhuakin man leh a ni.
Sairang YMA-in zu an man zawng zawng hi case 95 (um 1,140) a ni a, a neitu hriat a ni lo. Satha ipah dah niin, satha ip pakhatah case 2 zel dah a ni.
Zu hi motor hmang phurin, an thil man dahkhawmna hmunah an dah rih. A tihral dan tur chu an la ngaihtuah ang.
