Zu zuar mai ang u &#8211; Vanlalruata

Mizoram tan zu zawrh a tul nia a lan thu PC Party President Vanlalruata’n vawiin (10.12.2025) an party office kharna hunah a sawi.

PC President Mizoram sum dinhmun that theih loh dan sawiin, “Kumin budget-ah hian 17.47% chiah hmasawnna hnathawhna a ni. Hetiang vel hi kan dinhmun a ni reng. Hetiang a nih lai hian sorkar hnathawk hlawh leh hamthatna atan 47.06% hman a ni,” a ti.

Sorkar hnathawk hlawh pun tura tunah Central Sorkarin hma a lak mek thu sawiin Vanlalruata chuan, “Hlawh pun dan tur la tihfel a nih loh laiin a nihphung tur a lang ruak tawh a ni,” tiin tuna a lan danah sorkar hnathawk hlawh hi a let 2.46 velin a sang dawn nia a lan thu a sawi.

PC President chuan, “Hetiang hian a kal tak tak anih chuan kan state budget in sorkar hnathawk hlawh a daih dawn lo. Kumin budget atanga enin sorkar hnathawk hlawh hi 30.81% a ni a, pension hlawh (hamthatna) 14.95% niin hemi belhkhawm hi 45.77% a ni. He 45.77% hi a let 2.46-a a pung anih chuan 112.59% a ni tihna niin budget pumpui aiin a tam dawn tihna a ni,” a ti.

Hetiang taka sum dinhmun chhia hi siamthat anih theihnan sorkar ruhrel siamthat a suihtet ngei ngei a ngaih thu sawiin PC President, “Sum tam zawk sorkarin a neih theih nan leh zu chhe lutuk in avanga nunna tam tak kan chan reng tihtawpnan awmze neia zu siam leh zawrh mai a tulin a lang,” tiin zu zawrh a rawt.