F Sanglura a hla thar nen a rock leh dawn
admin 26-Jun-2024 02:46 PMMizo rocker F Sanglura'n 'Lem Ang Der Thiam' a chhawpchhuak e
Ani ang rual tan Zo rimawi khawvela rock music tuipui a, a khat tawka music video tichhuak reng peih hi an tam lo ngawt mai. Mahse, a kum lam a thliar lo vin, Zo rimawi khawvelah rock rimawi a lo hausak zel nan tiin min hlui mawlh mawlh mai a. Min la hlui zel teh se!
F Sanglura chuan, kumina a rimawi thar lam ber ni turin 'Lem Ang Der Thiam' tih chu YouTube lamah a chhawpchhuak leh ta a. Zo rimawi khawvela tun thlenga rock rimawi tuipui a, nghet taka vuan chhunzawm ngam langsar berah chhal pawh ni ila, a sual tampui awm lo ve.
'Lem Ang Der Thiam' hla hi, heavy metal rawng pawh a kai e. He hla hi F Sanglura phuah a ni.
He hla hi F Sanglura hian kumin tir lam khan, a thianpa, tuna Spicer College, Pune-a Asst Professor (music) hna thawk mek Mg Muang nen inbiain, an buaipui tan a. He hlaa guitar perhtu Mg Muang hian hmun hrang hranga a thiante - tuna USA-a awm mek Jasper Lynn (bass) leh Malyasia-a khawsa mek L Lian (drums) te nen an awmna hmun theuhah an chanpual theuh an buaipui hnuah, music video atan Francis Sailo chuan Zozial Recording Studio, New Serchhip-a a lo khawr pum ta a ni.
Tunah hian F Sanglura hian Mizo rock metal 'Phungpui Nu' tih pawh buaipui lai a nei mek a, thla khat hnu velah chuan a peih mai theih a inbeisei nghe nghe.
