MNF Thalaiin Phuldungsei an tlawh

Mizo National Youth Front (MNYF) hruaitute chuan an vice president Lalnunmawia Pautu hoin tunhnaia Mizoram Sorkarin ration card a paih sak chhungkaw 85 te chenna Phuldungsei khuaa an tlawh.

MNYF Vice President chuan ZPM Sorkarin Mizorama adhaar card nena ration card thlunzawm vek tawh Phuldungsei khaw mi 85 lai Mizoram ration card atangin an paihsak nia sawiin, 'Mizoram Sorkarin demawm kan ti hle. Mizo hnam rilru an put lohzia lan chianna a ni. Mizo khaw hlun leh pawimawh tak lo dintu Sailo Lal Hrangvunga Sailo Mizoram Sorkar lo awm tawhte, Mizo mipuite leh Phuldungsei khuate mai bakah Mizo hnam pawikhawihna a ni. Mizoram Sorkar lo awm tawh zawng zawngin ramri issue hi fimkhur tak leh thiam taka an ngaihtuah thin laia hetiang thil a thleng hi kan la thutak a, kan chhuichiangin a tul ang zelin hma kan la dawn,' a ti.

Harsatna awm hi an hriat veleh Bialtu MLA & MNYF President Robert Romawia Royte chuan CM Lalduhoma hmaichhana sawipui nghalin lehkha pawh a pe thlap tih sawiin MNYF chuan, 'Central Sorkara Ration Cards Management System mithiamte pawh a sawipui . Hemi chungchangah hian information kan neih belh zela Mizoram sorkar hian a tihsualah ngaihdam dil loa chhuanlam an siam zel a nih chuan chiangkuang zawkin hnam pawi an khawih dan hi lan puangchhuak zel ang,' tiin Phuldungsei khua mite hian Mizoram Sorkar chu an innghahna leh an thlamuanpui thin a ni a, tun tuma an hriat miah loha ration card paihsak an ni chu na an tih takzet thu an sawi.

MNYF tarlan danin, an zirchian danin Phuldungsei khuaa mi 85 te hi Mizorama adhaar card thlunzawm ration card nei vek an ni. April leh May 2024 thla-a an ration card-te hi an hriat miah loha paihsak an ni. Tripura Sorkar hian an state a adhaar nena an ration card thlunzawm hi an duh leh tum dan a ni a, Mizorama thlunzawm a nih avangin an ti thei lo. Mizoram Sorkarin a paih veleh Tripura Sorkar chuan a lo thlunzawm vat a, a lo paihsaktu Mizoram Sorkar chuan a thlunzawm thar leh mai thei tawh lo nia hriat a ni.