MPYCC-te chet duh dan a mak thin - ZPM

ZPM chuan thuchhuah siamin Zuangtuia Supply kudamah buhfai a tam tawk thu leh Mizoram Pradesh Youth Congress Committee (MPYCC) te chet duh thin dan mak an tih thu an tarlang.

ZPM chuan eptu party thenkhatin Zuangtui kudam tlawhin, buhfai a tlem thu leh mihring ei tlak loh pe chhuak ang hiala sawi an tum nia hriat a nih thu tarlangin, 'Heivang hian ZPM Headquarters Media Department chuan a hmun ah tlawh nghalin, tun dinhmunah buhfai a tam tawk tih chiang taka hriat a ni. Tin, buhfaite hi sorkar hmasa lam hun a, buhfai chhe tak, mihring ei tlak loh hial khawp a chhia pekchhuah thin ang kha a awm lo. Vawiina buhfai pek chhuahte pawh buhfai tha tak a ni tih finfiah a ni,' an ti.

Sorkar thar chuan dik tak leh tha taka tih a duh nia tarlangin ZPM chuan, 'Chuvang chuan retailer-te pawh a pawng a pui a ban leh thlak an awm lem lo. Tuna retailer thawk mekte hi MNF leh Congress vek an ni a, anni retailer-te hian buk dik taka buhfai an semchhuah ve pawh hi kan phut tlat a ni. Tin kumin, 2024 ah furpui nasa tak kan tuar a, vawiin ni thlengin ruah sur a la reh hlei thei lo tih kan hria a, hemi avanga kawngpui a chhiat viau lai pawhin Mizoramin buhfai khamkhawm kan nei thei a, vawiin ni ah pawh Zuangtui Kudam ah stock thahnem tak a awm  hi lawmawm kan ti,' tiin Supply Minister B Lalchhanzova hmalakna an fak.

ZPM chuan hetiang anga buhfai tam tham tak karah hian bag hnih khat chu a lo tha lo deuhte a awm ve lo thei lo tih tarlangin, 'A lo awm palh a nih pawh in chungte chu pekchhuah an ni ngai lo. Kan opposition unauten Zuangtui kudam tlawh a, hai baw chawp a, chhe tak anga lan tir an tum hi pawi kan ti  takzet. Hetiang anga thudiklo hmanga mipui bum tum hi sim tawh se kan ti hle. Tlanchhe chunga Congress Party-in buhfai chhia eitlak loh awm anga an tarlang hi a pawi kan ti a, a hmun ngeiah kalin kan endik nghal. Congress Party hian buhfai tam tak awm zinga a bal zual lai an rut tih kan finfiah a ni,' an ti.