MPCC Treasurer-in press conference a ko

Mizoram Pradesh Congress Commiittee (MPCC) chuan vawiin (30.9.2024) chhunah press conference an koa, thusawitu MPCC Treasurer Dr Lalmalsawma Nghaka chuan, 'ZPM-in kan sorkar chuan an manifesto-a an ziah leh sawi uar em em thlai thar lei chu kalpui tumin hma a la mek zel. Kan hriat theuh angin sorkar lai ZPM hian inthlan hma atangin an thlai thar leina atana sum DAH hi an aupui nasa a. Heng thlai pali Sawhthing, Aieng, Hmunphiah leh Hmarcha bik phei chu sawrkin minimum support price a pek tur a ni a, research based a kalpui an tum thu an sawi thin,' a ti.

An thlai thar lei programme hi tihlawhtling turin khawtinah farmer society an din chho mek tih sawiin Dr Lalmalsawma chuan, 'Khaw tam takah farmer society an lo din tawhna awm mah se, chungte chu hlamchhiahin ZPM unit-te kaihhruai in society hi an din zela. He mi chungchangah hian thil dik lo tamtak thingtlang lam atangin kan dawng,' tiin chung zinga pakhat, Mamit District-a Rajiv Nagar khua a thil thleng hi a nih thu a sawi.

MPYCC Treasurer sawu danin, Rajiv Nagar-ah hian broom society pathum a awm tawh sa a, hei hi pawm loin ZPM Sorkar chuan Co-operative Farming Society, Rajiv Nagar - I a inchhunfin turin Land Resource, Soil & Water Conservation Director Hualthanga Chhakchhuak hmangin lehkha Memo No. B 15015/1/2024-DTE(LR&EC), Dt 11th July, 2024 hmangin heng society awmsate hi hriattir an ni. Hetah hian an inchhunfin a ngaih chhan chu society pathum an awm kha sorkar hnuaia Agriculture Marketing Assurance Fund Management Board(AMAFMB) duhdan kalh a nih vang a nih thu ziah tel a ni.

He lehkha bawhzui hian LRS&WC Director bawk hian Rajiv Nagar - l Broom Grower Society inthlanna nei turin Office Order, Memo no.B.14015/1/2024-DTE(LRS&WC) hmangin a hriattir nghal a, inthlanpui tur pawh department mi leh sa pathum an ruat nghal .

He office order bawhzui hian ni 6.8.2024 khan YCA Hall, Rajiv Nagar - l ah pute C Rinsangpuia ASCE, PC Lalremsiama DO (Mamit) leh Lalrammuana Sailo, RO te kaihhruaiin  inthlanna an nei ta a ni.

Heta an thlanchhuahte hi ZPM VC Bahulal Chakma-te chuan an pawm thei loa, ZPM hotute hnenah an zualko ta a ni. ZPM tana Mamit bial viltu ZPM Secretary H Zorempuia chuan department changtu minister hmuiin recomendation an la a, society menber-te thlanchhuah ni lo Bahulal Chakma chu society hruatu ah an ruat ta a ni.

He thil dik lo tak hi Rajiv Nagar-a hmunphiah chingtu society a telte chuan an pawm thei loa, hriatthiam harsa an ti hle a ni. Agriculture Minister-in hetia a ti ta mai leh, VC member pakhat leh ZPM Secretary-te duh dan dan a a kal ta mai hi, a ngaihna a hriat loh zia leh, mi pahnih khat duh dan angin an kal mai nia sawii Dr Lalmalsawma chuan, 'Sorkar officials ngeite ruahmanna siam pawh zah zo lo khawp a huaisenna a nei lo hian, mipui nawlpuite huap zo lo, party bil uchuak taka a duhsakna thil a ti ta mai hi a pawi hle a ni,' a ti.