Mizoram News

FIFA standard vekin field kan siam - RRRa

admin 08-Nov-2024 02:59 PM

---

Sports Minister hlui Robert Romawia Royte, MLA chuan vawiin (8.11.2024) hian Aizawl Press Club-ah press conference neiin, sports incentive cash award dawng thei lo bik sports discipline an awm loh thu leh MNF hunlaia field siamte chu FIFA standard size vek a nih thu a sawi.

Robert Romawia chuan sports incentive cash award-ah sports association-te pawh an fiah tawk loa a hriat thu sawiin, 'A discipline ni loin, medal an lakna inelna zawk kha a pawimawh. Arm wrestling, carrom board etc. in an dawng thei lo tihna a ni lo. State, national games etc.-ah medal an lak chuan eng discipline pawhin an dawng thei, dawng thei lo bik an awm lo. Sports Minister ka nihlai khan sports incentive cash award hi kan tisang,' a ti.

Denic-a leh midang pahnihin medal an lakna chu Asian Arm Wrestling Championship a nih thu sawiin Sports Minister hlui chuan, 'Gold medalist-in cheng nuai 7, silver medalist pahnihin cheng nuai 3.5 an dawng mai tur a ni. Arm wrestling a nih avanga dawng thei lo anga ngaih hi danah a ni lo. A discipline ni loin, a tournament a pawimawh. Denic-ate tan dan thar siam chiah ka ngai lo, 50% pek dan zawn ngai loah ka ngai,' tiin Sports Minister chu la nise dan awm sa anga pek dan a zawn mai tur thu a sawi.

Robert Romawia chuan MNF Sorkar laia field siam a te lutuk nia sawi leh badminton court size leh football ground tehkhin chu mipui hruaikawi tumna mai a ni em tih ngaihtuah ngai tak nia sawiin, 'FIFA law of the game danah chuan football field size chi hran hran siam theih a ni. FIFA standard dinglai ang chuan field te ber chi (minimum size) chu 45X90 metre a nih laiin, a lian ber (maximum size) chu 90X120 metre a ni thung. International match khelhna tur atan erawh chuan a te berah 100X64 metre a nih a ngai,' a ti.

Mizoram hmun hmain a zir loh avangin field nasa taka an tih zauh thu sawiin Rober Romawia chuan, 'MNF hunlaia UD&PA leh Sports Department field siamte FIFA standard size vek a ni. Badminton World Federation chuan badminton court standard size pakhat chauh a nei thung. Hetiang a nih avang hian he thil intuha lo lutuk khaikhin hi Mizo mipuite bum tumna leh ngaihnepna a ni em tih hi ngaihtuah tham tak a ni,' tiin a hmunhma a rem ngang loh avanga international competition thlen theihna tura lian erawh chuan an tih theih vek loh thu a sawi.

---