Kan sorkar tuk atangin beih kan tawk - Duhoma
admin 17-Jan-2025 03:55 PMAizawl South-II ZPM chuan vawiin (17.1.2025) chhun khan R Dengthuama Hall-ah conference an hmang a, an hun hmanpuitu Chief Minister Lalduhoma chuan an sorkar tuk atangin beih an tawh nghal thu a sawi.
Chief Minister chuan an sorkar tirh khan, 'thlai thar kan buaipui ang' an tih thu sawiin, ' Nikumah hmunphiah bikah agreement kan ziahpui company-in min ti mualpho hle mai. Kuminah erawh empanelled firm 7 te nen agreement kan ziaka, hmunphiah ro hi an lei zo vek thei lo a nih chuan sorkarin a lei ang. Home hrang hranga awm thalaite hnathawh tur kan siam sak dawn. Kan sorkar tuk atangin beih kan tawk nghal a, thil tha kan tihte hmu thei loin sawiselna tur an zawng nasa hle, 'in sawhthing lei kan ba lo' ti tute ngeiin kuthnathawktute kan han ngaihsak chu min beihna an zawng leh si a, thil tha kan ti ang tih hi an hlau em em. Mah se, kan ram tan hian thil tha tih kan thulh dawn chuang loa, kuthnathawktute an banah kaiin kan khai chhuak ngei dawn,' a ti.
Tun dinhmunah sawhthing pawh a chawh hun runpui kan la thleng lo tih sawiin Lalduhoma chuan, 'Kuthnathawktute hmakhaw ngaiin a to hun kan nghahpui hret a, kan lo sawi tawh chu tihhlawhtlin ngei kan tum a ni. Ram mipuite hian min beiseina leh min tehna a sang bik a, tun sorkar mekah hian buk lung han khai chhin u la, sorkar laka lungawi lo ni a inhriatte chu mimal hamthatna um anni zel ang. A him chin leh a mawi chinah te chuan party mite kan inhre ve ang, amaherawh chu mimal hamṭhatna duh lutuk avanga innawr vak vak te hi a ṭha lova, ZPM in ram siam kan tum dan nen pawh a inpersan hle a ni. ZPM chu kan danglam tur a ni kan tih kha a la ngai reng,' tiin Zoram hmangaihna rilru tak tak pu chungin party tan thawk zel turin an party mite a sawm.
Chief Minister chuan party leh sorkar timualpho khawpa hnathawk chhia, ram hmangaihna nei lo, hlep hnem tum ringawt an awm a nih chuan party atang pawhin an inchawlh tir hreh dawn lo tih sawiin, 'Sorkar hmasa atanga kan chhawm, hna chhia leh tlo lo tak tak buaipui ngai a awm teuh mai a, ZPM sorkar hnua thawh chu a ṭha bik tur a ni a, a danglam tur a ni,' a ti.