A phu tawk hremna pek duh

Mizo Hmeichhe Insuihkhawm Pawl (MHIP) General Headquarters chuan thuchhuah siamin, an hmeichhiatpui Rebek Chanchinthathangi (42), Salem Veng, a pasal C Lalsiamliana'n a sawisa hlum an dem takzet tih tarlangin, tualthattu hi dan anga a na thei ang ber a hrem an phut.

C Lalsiamliana'n a nupui Rebek Chanchinthathangi khawlaiah a fate hmuh lai ngeia saruaka a sawisa chu an ngaithiam thei lo tih tarlangin MHIP chuan, 'Tualthattu hian a phu tawk hremna hmu ngei se kan duh a, thuneituten dan anga na taka an hrem ngei kan phut tlat a ni. Mizo hmeichhiate chungah kutthlakna leh thihna a thleng fo hi vanduaithlak kan ti,' tiin tun hnuah chuan hetiang ang tualthahna rapthlak tak hi thleng tawh lo se an duhthu an tarlang.

MHIP chuan Mizo mipate chu an innghahna leh anmahni venghimtu, an thlamuanpui thin an nih thu tarlangin, 'Mizo mipa mi tha leh innghahna tlak tam tak an awm laia  hmeichhe awm nem zawkte kutthlak duh tawk mipa rilru pu an lo awm thin hi pawi kan ti. Tun hnuah chuan Mizo hmeichhiate tan thlamuanpui tlaka awm zel tawh turin Mizo mipate kan ngen,' an ti.