Ruth-i lehkhabu thar tlang
admin 17-Feb-2025 05:57 PMVawiin (17.2.2025) chhun khan Minister of State Lalnghinglova Hmar chuan a office-ah kum 21 mi Ruth Lalrohlui, Tuikual South lehkhabu pangana 'A' a tlangzarh.
Lalnghinglova Hmar chuan kum 21 mi lek a ni chunga Ruthi-i'n lehkhabu panga lai a ziak tawh chu fakawm a tih thu sawiin, 'A rualpui zingah hian lehkhabu ziah chu sawi loh, panga pawh la chhiar lo an awm ang tih a hlauhawm. Tunhnaiah lehkhabu chhiar kan intihhmuh leh tan deuh niin an sawi a, a lawmawm ka ti hle,' a ti.
Ruthi-i chuan a lehkhabu thar chu poetry dahkhawm a nih thu sawiin, 'Poetry hi ka tui ngai lo. Chutihrualin, literature lama kan tui a nih chuan eng chi pawh chhiar tha ka ti a, ka phak ang tawkin ka chhiar ve thin. Lehkhabu ziahve ngei tha tiin, hma ka la a ni,' tiin poetry bu a ti chhuak thei chu lawmawm a tih thu a sawi.
Kum 21 mi lek ni chunga Mizo Academy of Letter member ni tawh Ruthi-i hian lehkhabu hi English vekin a ziak a, Akrasia a ziah hmaa a lo ziah tawh - Trouble Maker, Shallow, Ignoria leh Jengkha Diary-te chu thawnthu (novel) vek an ni. Tun tumah hian a ziah ngai lo lam poetry lam a rawn hrut a, novel ziah chawlhsan erawh a tum lo.
Akrasia hi phek 127 a chhah niin, poetry 127 a awm a, paperback Rs. 250 leh hardcover Rs. 350 man a ni. A duh tan chuan Amazon leh Flipkart-ah a chah theih.
Ruthi-i hian lehkhabu ziah chauh a thiam loa, lehkha pawh a thiam tel. Kum 2023 HSSLC (Arts) ah khan Mizoram pumah parukna a ni a, tunah hian Pachhunga University College-ah BA a zir mek a, civil service nih tumin theihtawp a chhuah.
