Dan loa lak kan awm kan hre lo - AMCECC

All Mizoram CSS Employees Coordination Committee (AMCECC) chuan thuchhuah siamin, 'Sorkar lakah lungawi lohna pen/tool down strike kan neih mekah CSS member-ten kan thlawp tha chu lawmawm kan ti hle,' tiin member zawng zawngte chungah lawmthu an sawi.

AMCECC chuan pen/tool down strike an neih hnuah hian Mizoram Sorkar chuan inbiakna mumal engmah a la neihpui lo tih tarlangin, 'Chutihmek lai chuan Chief Secretary charge la mektuin press conference-ah CSS hnuaia dan loa lakte chu dahngheh theih an nih loh thu a sawi leh, AMCECC thil phut an tih hlawhtlin chuan India Constitution bawhchhiat a ngaih dawn thu a sawi hi hriatthiam har kan ti a ni,' an ti.

CSS-te dinhmun hrechiangtu sorkar chak tak chuan CSS-te dahngheh theihna tur dan ‘Govt, of Mizoram Regularization of CSS Employees Scheme, 2024’ chu duhsak takin a siam sak nia tarlangin AMCECC chuan, 'He dan hi a taka kan hman ngei theih nan kan Chief Minister zahawm tak pawhin a theihna dan zawng hram hram tura thuneitute a chah mawlh mawlh laiin, min dahngheh theih nan hma la lo a, a harsatna leh a theih lohna dan min zawn sak zel tu an la awm fo hi kan duhlo takzet a ni. Mizoram sorkar hian a duh chuan CSS hnuaia thawk te a lo dah ngheh fo tawh thin,' tiin anni aia mumal loa lakte pawh dahngheh an lo ni tawh thin tih an tarlang.

AMCECC member dan lova lak an awm an hre lo tih tarlangin, 'Sorkar appointment order mumal tak nei veka lak kan ni, dan dik loa lak kan awm a nihchuan dan loa min latu chu sorkarin chhui chhuakin, a mawhphurtute chungah na taka hmala turin kan phut a ni. AMCECC hnuaia thawkte hi thalai lehkha thiam rual, kan hun tha leh theihna, kan vanglai hun zawng zawng hmang ral raih a Mizoram tana thawktute kan ni. Tuna kan hmalakna hian thalai hna zawng mek leh thangtharte tan thil tha zawk a hrinchhuah dawn avangin sorkar leh mipui pawn ngaihtuahna nasa tak leh uluk taka min dawnsawn sak turin kan ngen a ni,' an ti.

AMECC chuan pen/tool down strike hmanga lungawi lohna an lantirin awmzia a nei lo a nih chuan April 21-23, 2025 chhung hian mass casual leave lain, nawrhna an chhunzawm tur thu an tarlang.

AMECC phutte :

* Provisional employees/state contract-te tan an mamawh anga departmental promotion committee (DPC) awlsam taka sorkarin a siamsak thin ang hian CSS employee-te tan DPC siam ngaiah leh corresponding post siam rem leh a tul dan a zira equivalent/temporary post siam ngaiah min siamsak turin kan phut a ni. 

* CSS hnuaia thawkte hi hmasawnna hna  hrang hrang thawktu leh sorkar kutke berte zing a mi kan ni. Amaherawhchu, kawng hrang hrangah enhran leh hlamchhiah kan ni fo thin hi na kan ti. Mizoram hmasawnna atan thahnemngai taka kan thawh angin hamthatna leh kan service-ah min duhsak ve turin kan phut tlat a ni.

# Mizoram sorkar hnuaia a nghet a thawkten a hun taka hlawh an lak thin laiin CSS hnuaia thawkte’n hlawh kan la mumal lo fo thin. CSS kan kalpui danah tun aia chak leh zualin central atanga fund nawr chhuah a nih theih nan hma min laksak turin kan phut a ni.