Minister-in Thaidawr tlang a tlawh

ZPM chuan thuchhuah siamin, vawiin (15.4.2025) chhun khan Forest Minister Lalthansanga chuan tun hnaia Mizoram chhunga Tripura Sawrkarin kut a rawn thlakna Phuldungsei Jampui Hills khuaa Thaidawr tlang a tlawh a, Jampui Mizo Convention hruaitute leh Phuldungsei khawtlang hruaituten an lo dawngsawng tih an tarlang.

Forest Minister chuan Thaidawr Tlangah hian Tripura Sawrkarin hma an lo la a ni tih an hriatin a hmun ngeia enfiah hi tul an tih tih thu sawiin, 'Helai hmun hi tuan leh manga ta Mizo lalte luah ram leh thuthmun a ni. Chutih rualin helai hmun enkawl leh tuaihnum kawngah kan lo muthlu rei hle a ni tih Mizo Convention hruaitute nen kan inkawmna atangin a lang reng mai a, hei hi a pawi takzet a ni. Kalphungthar mipui Sorkar hnuaiah he lai hmun hi ngaihsak chhoh zel kan tum ang,' a ti.

Chief Minister kum 40 zet he ram tana lo bei tawhtuin Mizoram ramri hi a vei tih sawiin Lalthansanga chuan, 'Boundary Commission tha tak din niin Assam nena kan ramri buaina chungchang pawh he Boundary Commission hian a bawhzui mek. Hetianga Tripura Sawrkarin kan ram chhunga kut a rawn thlak hi a ngaihthah mai a rinawm loh a, chuvangin helai chhehvela cheng mipuite pawhin lungrual taka sorkar hmalakna thlawpa in thawhpui zel ka beisei,' tiin politics inchirtheh nan leh inlungrualna tichhetu tan hmang lo turin a chah.