Zirlaiten kawng an dang

Govt. Serchhip College zirlaite chuan sorkara an thil phut tih hlawhtlin duhin tukin (16.4.2025) dar 8:30 vel atang khan kawng an dang a, thuziakte an ken bakah an au rual.

Kawng an dan tur chungchangah Govt. Serchhip College Students Union hruaitute chuan nimin khan Serchhip Press Club-ah press conference an nei a, tiamchin awm loin college chhunga vantlang kawng, DC leh a hnuaia officer zawng zawng te chenna Khawtetlang panna kawng dan an tum tih an sawi.

SU Vice President Benjamin Lalhmangaihkima chuan an college-a lecturer mamawhte Chief Minister leh Higher & Tech Education Minister hnena vawi eng emaw zat an lo thlen tawh chu tun thlenga tih hlawhtlin a la nih loh avangin lungawi lohna an lantir dawn tih sawiin, 'Lecturer kan mamawhna hi nikum lam atangin thuneitu sangah kan thlen tawh,' a ti.

Benjamin-a chuan kumin February thla khan Chief Minister-in Serchhip District Hospital-a ultrasound thar a hawn naa a thu sawiah college-ah hian zirtirtu Geography department-ah a nghet pahnih, Zoology department-ah a nghet pakhat leh nghet lo pakhat, leh BCA department-ah a nghet lo pakhat dah belh a tiam nia sawiin, 'Vawiin thlenga, Higher &Tech Education Deptt-in a la tihhlawhtling lo,' tiin kum 6 chhungin zirtirtu nghet 13 zet sawn chhuah an nih thu leh an aiah nghet lo dah thin an nih thu a sawi

SU hruaitute sawi danin, tun dinhmun ah GSC ah hian zirtirtu nghet lo 31 lai an neih laiin, a nghet chu 21 chauh an ni. Focus district a la puan ve loh district  zingah Serchhip College chauh hi Multidisciplinary College (Arts, Science leh BCA awm vek na college) awm chhun n ni a, infrastructure a pachhe ber an ni.