MNF Programme & Policy Board an ṭhukhawm

Vawiin (April 16, 2025) dar 12:00 khan MNF Party-a Programme & Policy Board thar lte chu an Chairman Dr. R. Lalthangliana, MNF Senior Vice President hoin MNF office-ah a vawi khat nan an ṭhukhawm

MNF Programme & Policy Board hi April 9, 2025 khan din a ni a, member 22 an awm.

MNF thuchhuah tarlan danin, MNF Party hian a din tirh aṭangin programme leh policy mumal tak a nei sa a ni. Nimahsela, khawvel hmasawnna leh hun inher zelah policy tam tak her damlam te, siamṭhat leh belh ngai te, paih leh kalsan ngai te a awm ṭhin.

Chumi avang chuan Mizo National Front chuan khawvel thiamna leh hmasawnna technology ṭhang chak tak milin programme & policy ennawn (revise) tu tur leh duang thartu tur a nei chho leh dawn ta a ni.

MNF Programme & Policy Member zingah hian mi thiam tak tak Mizoram University professor rual te, college hrang hrang zirtirtu te, engineer rual leh medical doctor te, dan hre mi te, Finance lam thiam bik te, sumdawng hlawhtling tak tak te, entrepreneur lama mi hlawhtlingte leh journalist-te chu member an ni.

Dr. R. Lalthangliana chuan, 'Mizo mipuite tana ṭha ber tur, kan ram, kan hnam, kan sakhaw humhimna turin MNF chuan nasa takin hma a la tawh a, a la zel dawn. Kan tun dinhmun aṭangin engtin nge khawvel hmasawnna milin ke kan pen ang tih leh kan ram sik leh sa mila intodelhna kawng kan zawh theih dan tur mumal tak kan siam dawn a ni. MNF-in policy a lo neih tawhte hlamchhiah vek loin tun leh tuna kan mamawh tur te, long term atana kan tih tur mumal tak sorkar ruala kan bul ṭan nghal dan tur ngaihtuahtu tur leh hmachhawptu tur kan ni,' a ti.