Congress sorkarah hlimna a thleng - Lal Thanzara

MPCC President Lal Thanzara chuan vawiin (21.4.2025) chhun khan Dampui, Mamit, Vawngawnzo, Damdiai leh Suarhliap khuate a tlawh a, ZPM chu engkim ti theiah inngaiin an inzuar nia sawiin, 'Mahse, a tak takah chuan engmah an theih lohzia Mizoram in a hmu mek, Mizoram politics inthlak danglamna bul intanna Aizawl khawpuiah Local Council inthlanah Congress an che tha ber, chu chuan Congress party tho leh vat tura mipuiin an duhzia a lantir a ni,' a ti. 

ZPM Party-in a intiam angin phur takin kuthnathawktuten sawhthing an ching tih sawiin MPCC President chuan, 'Mah se, rilru nâ in an awm hi pawi ka ti takzet. MNF Sorkarah kut hnathawktute mangangin chemtum nen Aizawl khawpuiah kawng an zawh a, tun ZPM sorkarah pawh hian kut hnathawktute rilruna leh mangang hian rapthlak takin lungawi lohna kawng an zawh a thlen hlauhawm khawpin an rilru a na a ni,' tiin ZPM leh MNF sorkar hnuaiah Mizoramin manganna nasa tak a tawh thu a sawi. 

Lal Thanzara chuan Congress a sorkar chuan Mizoramah thlarau malsawm hlimna a thleng tih sawiin, 'Mizoram a him a ni. Kan ram kan hnam a him hi a pawimawh ber. Congress sorkarah sakhaw zalenna a thleng a,  hnam hnufual leh tlem zawkte an him thin. Tunah hian Congress party chu Central-ah Congress kaihhruai sorkar a ding thei reng tawh. Mizoramah pawh sorkarah mipui beiseina a hniam sawt em avangin kum 2028 hma hian inthlan that mai pawh a tul loang tih a sawi theih loh. Kalphung thar sorkar hnuaiah Mipuiah sum lengvak a tlem em em, ruihhlo a hluar a, chanchin thar chhiar leh ngaihthlak hrehawm khawpin kan rama thil thleng tha lo a tam. Congress party a sorkar loh chuan ram a him lo,' a ti.