Mizo tlangval a ropui

(A ropui em a, a post tu Madawnga Khiangte kan dil a, a phalnain kan post chhawng)

Lalhnehpuia chhakchhuak, Aldrin Lallawmzuala leh Dr Lalrinsangi te fapa, Zarkawt chuan USA ramah zirlai tiṭha bik te hnena hlan ṭhin Ahnfeldt Medallion a dawng.

Hnehpuia hi Chicago USA ah BSc a zir mek a, nizan khan North Park University Graduation Program ah Ahnfeldt Medallion hi hlan a ni. He Medallion hi zirlai ti ṭha bik, GPA hmu sang ber hnena hlan ṭhin a ni. Hnehpuia hi BSc (Psychology) ah North Park University Topper a nih vangin a dawng a, Indian zirlai te aiawhin India flag kengtu ah thlan a ni bawk. 

Tun kum tir khan College Conference of Illinois and Wisconsin (CCIW) Dave Wrath Academic All Conference chu a vawi thum nan hlan a lo ni tawh bawk. He award hi Illinois leh Wisconsin State a university hrang hrangte Sports lama inelna a tel ṭhin (Student Athlete) te hnena pek ṭhin a ni. He award dawng tur hian GPA 3.30 chung lam hmuh a ngai thung. He Award hian sum leh pai keng tel lo mahse an hmalam hun atan a pawimawh hle a ni.

Kan hriatthiam theih turin zirlai zinga infiam mi zinga lehkha thiam, 93% ai sang hmu ziah ṭhin nih a ngai a, Hnehpuia hian Semester 9 an Exam tawhah GPA 4/4 a la hmu ziah a, an University bik ah pawh Deans List ah a la tel pha ziah a ni. 

Ani hi National Collegiate Athletic Association (NCAA) Third Division khel mekin, North Park Vikings Men's Basketball Team (JV) ah a tel mek bawk a ni.

Hnehpuia hi kum 22 a ni mek a, ft 6 leh inchi 2 niin, Basketball a khelh thiam leh a lehkha thiam vanga USA a lehkha zir zawm tura thlan a ni nghe nghe.

Infiamna lama mi chhuanawm, lehkha thiam bawk si, USA ah pawh hnamdangin an tluk loh ni thei, Mizo tlangval hi kan chhuangin kan lawmpui a, a kal zelna turah duhsakna kan hlan e.