Cheng khat pawh ka eiru lo - C Ngunlianchunga

Lawngtlai West Bialtu MLA C Ngunlianchunga, Congress MLA chuan Anti Corruption Bureau (ACB) thubuai a neih an chhui mekah anticipatory bail lak a tum loh thu leh cheng khat pawh a eiruk loh thu a sawi.

Vawiin (12.5.2025) a Trained Nurses Association of India, Lawngtlai District Branch-in International Nurses Day LADC Hall-a an lawmna a hmanpui naah thu sawiin C Ngunlianchunga chuan, 'Lawngtlai By Pass Raod laihnaah thilfel lo a awm nia hriat chungchangah he hna buaipui tanlaiin LADC CEM ka nihlai a ni. Ka thubuai sorkarin court lam ah ngaihtuah a remti tawh. Ka thubuai neih hi eirukna, hlemhletna lam a ni lo,' a ti.

C Ngunlianchunga chuan by pass road atan ram neitute tlawmngai tura a ngennaah a hnulamah he project lo puitling lo zui nen thuneihna hmang sualah puh a nih thu a sawi, 'Assembly House-a ka lo sawi tawh angin, eirukna a ni emaw, thuneihna hman sualna ah pawh inhnamhnawihna ka nei lo,' tiin cheng khat pawh a eiruk loh thu a sawi.

Ram tan chuan jail tan pawh a in huam thu sawiin C Ngunlianchunga chuan, 'Jail tan mai pawh ni lo, a tawp thlengin ram tan chuan tawrh ka huam. Min puhnaah hian cheng khat pawh ka eiru lo,' a ti.

MizoramSorkar chuan Lawngtlai West bialtu MLA chhui phalna leh a chungthu ngaihtuah phalna, prosecution sanction order chu April 30, 2025 khan a ti chhuak.

Tarlan tawh angin, Assembly Budget Session hnuhnung berah Chief Minister Lalduhoma chuan C Ngunlianchunga'n thubuai a neih hi a sawi chhuak a, C Ngunlianchunga chuan thubuai a neih loh thuin a chhang. A hnuah C Ngunlianchunga chuan ACB-te a biaknaah thubuai a nei tih a hriat thu press conference-ah a sawi a ni.

C Ngunlianchunga hi LADC CEM a nih laia Lawngtlai By Pass Road siam chungchangah midang nen thubuai siam sak a ni. Ani chuan minister a nih chhoh tak avangin pawisa cheng khat pawh a khawih ve loh thu a sawi.