Hot mix plant vangin man hnem

Ni (9.5.2025) zana Mizoram PWD hot mix plant, Zuangtui a mi tihchhiat a nih vangin police-in an man nual.

Police atanga thudawn danin, he thubuaiah hian mi 15 vel rinhleh thuah man an ni. Chhui zui mek zel a ni.

Tarlan tawh angin ni 9.5.2025) zabkhan Mizoram PWD hot mix plant, Zuangtui a mi chu a control-na mipuiin an tichhia a, PWD leh  Sky Builders, Nidhi chuan Bawngkawn Police hnenah FIR an thehlut.

Zuangtui atanga Bengvarna thudawn danin, PWD hot mix plant dahna chhak leh thlangah hian chenna in a awm ve ve a, hna an thawh lai chuan thil khu dum a chhuak nasa thei hle. Helai vela chengte chu an hrisel loh phahin, an thlaite pawh a tha thei lo. An tukverh leh kawngkharte pawh an hawng ngam ngai lo.

Hetiang a nih avang hian Zuangtui Veng khawtlang chuan thuneitute hnenah pawh an thlen ṭhin a, mahse dah san a ni chuang lo. Zuangtui khawtlang hruaitute hlauh ruk ang ngeiin thil a thleng ta a ni.

Thudawn danin, hot mix plant tak hi chu thir chhah pui pui a nih avangin tih chhiat a harsa a, a bula a control na hmun chu hal chhiat a ni a, thildang ṭhenkhat pawh a chhia. Hei vang hian tun dinhmunah hot mix plant hi hman theih a ni lo. Tunlaia Aizawl kawng siamna atan he hot mix plant hi hman ber a nih avangin, kawng siam chhunzawm theih a ni dawn em hriat a la ni lo.

PWD leh Sky Builders, Nidhi-te'n FIR an thehluha an tarlan danin, hot mix plant control cabin unit, air conditioner (1 ton), hote mix plant mixing drum, hot mix plant wiring zawng zawng, mixing drum motor, cilinger motor, vibrating motor, feeder motor, filler motor, hot mix plant jection box, grease gun & tool box, solar light, decanter control panel leh decanter diesel pump-te a chhia.