Mithiamte'n Ngaizel leh Hlimen an enfiah
admin 13-May-2025 07:52 PMMizoram Sorkarin a chah chhuah Maccaferri Geo-technical Solutions Pvt Ltd. Sr. Manager Manthan Chauhan leh Council of Scientific & Industrial Research - Central Institute of Mining & Fuel Research (CSIR-CMIR) Chief Scientist Dr C Sawmlianate chuan Aizawl DC Lalhriatpuia hoin Ngaizel leh Hlimena lung tlak thinna leh lung tlak mai hlauhthawnawmna hmun an endik a, khawtlang hruaitute'n an tawiawm a ni.
Mihring leh lirthei veivakte tana him lo hmunte an endik zawh hnu hian Chief Minister's Conference Hall-ah DM&R Minister Prof. Lalnilawma hoin hmalak dan tur ruahmannate an sawiho.
Inhmuhkhawmnaa tarlan a nih danin, Ngaizel kham phei km 1.7 a thui chu lung tlak hlauhawmna a ni a, chung zingah meter 405 chu very high hazard' a nih bakah meter 740 dang pawh 'vulnerable' anga ngaih theih a ni . Chhinchhiah danin September 24, 2015 leh May 1, 2025 inkar khan lung tla avangin lirthei chhia 26, mihring inhliam 9 leh thihna tum 3 a thleng tawh a ni.
Thutkhawmnaah hian mithiamte chuan Ngaizel lung tlak thinna hmuna khamte chu rawt zawl deuh (re-slopping) te, tui put awm nasa ven te, thirlen rintlak tak hmanga tuam a concrete a phuh (gunite) theih dante an tarlang. Kham chunga chenna in engemawzata bawlhlawh leh tui chhe paihna mumal zawk siam leh lung kara thing zung lut tam tak suat pawh a tul tur thu sawi lan a ni bawk.
