Hna lak tawh cancel

Mizo Zirlai Pawl (MZP) General Headquarters chuan thuchhuah siamin, National Health Mission (NHM) hnuaia hna hrang hrang pasarih lakah, advertisement chhuah a nih loh bakah, DP&AR(ARW) OM- Guidelines for engagement of co-terminus (contract or provisional or otherwise) employees under Centrally Sponsored Scheme/Central Sector Scheme/Externally Aided Projects, etc, 2021 tlawhchhan miah loa lak a nih avangin cancel turin sawrkar an ngen thu tarlangin, 'Kan ngenna angin June 9, 2025 khan heng hna lakte hi sut a ni,' an ti.

An ngenna Health & Family Welfare Dept.-in an hna lak tawh an sut leh chu lawmawm an tih thu tarlangin MZP chuan, ' Health Minister Pi Lalrinpuii pawhin, press conference meuh neia MZP duhdan anga sut a nih tur thu a sawi hi a puitlin thlak hlein kan hria a, lawmthu kan hrilh a ni. MZP chuan Mizoram Sawrkar hnuaia hnalak hi dik takin kalpui ni thin se a duh. Advertisement tel lo a duh duh inthun theihna remchang hi tun hnuah khawi dept.-ah mah thleng nawn tawh lo se kan duh a ni,' tiin thalai hna zawng mekte ti hnual thei zawnga diklo taka hnalak a awm tawh loh nan hma an la chhunzawm zel dawn tih an tarlang.

National Health Mission (NHM) hnuaia post 7; Lab. Technician- 3, Staff Nurse- 2, Asst. Data Manager-1 leh Executive Asst.- 1 te hi advertisement tello a lak nia MZP in a hriat avangin, June 3, 2025 (Thawhlehni) khan emergency meeting a ko a ni. He hnalak hi June 10, 2025 ral hma ngeia cancel turin sawrkar a lo a ngen tawh a ni.