Chhungkaw hlamchhiah lo turin fuih

Social Welfare, Women & Child Development Minister Lalrinpuii chuan vawiin (10.6.2025) chhun khan Thuampui YMA Hall-ah MHIP General Headquarters leh Aizawl District Nasha Mukt Bharat Abhiyaan (Drug Free India Campaign) tangkawpten Thuampui Branch MHIP member-te tana ruihhlo chungchang inzirtirna leh a thlawnna inentirna an buatsaih chu a hmanpui.

Lalrinpuii chuan ruihhlo dona kawnga nu leh hmeichhiate pawimawhna an tawrh dante sawiin, 'Chhungkuaa ruihhlo ti an awm hian a tuar nasa ber chu nute hi an ni tlangpui a, chuvangin, hma kan lakna kawngah pawh nute hnena zirtirna pek hi kan thlahthlam thei lo. Ruihhlo ti mek kan buaipui lai hian ruihhlo la ti ve lote venhimna kawngah pawh zirtirna kan pek nasat a ngai hle a ni,' a ti.

MHIP member-te chu khawtlang leh kohhranah theihtawpin an inhmang anih pawhin mahni chhungkua hlamchhiah lo tura fuihin Social Welfare Minister chuan, 'Engkim bul intanna chu chhungkua a nih tlat avangin nute hian chhungkuaa mahni tih tur leh mawhphurhnate theihtawpa hlen chhuah tum theuh turin ka sawm duh che u,' tiin nuho kalkhawm chu a chah a ni.

Lalrinpuii chuan mitin mai hian ruihhlo kan do ta nia a hriat thu sawiin, 'Sawrkar pawhin theihtawpa hma la chho zelin tunah hian ruihhlongai khawlaia teirawlai hote enkawlna hmun tur ‘Hulhliap- Short Stay Centre’ chu din tumin chak takin hma a la mek. Hetah hian sorkar department hrang hrangte leh tlawmngai pawlte pawh kan tel vek dawn a ni. Heti khawpa ramin kan buaipui anih avang hian keini pawh hian mahni theihna zawnah hma kan lo lak ve hi kan ram venhimna atan a tul tak zet tawh,' a ti.