CM hlui thah tuma puhna thubuai a tawp

Aizawl District Court-a Judicial Magistrate First Class chuan chief minister hlui Zoramthanga thah tum tua puh Rodinliana (39) s/o T Ngursiama (L), Khawzawl Hermon Veng leh  Chanchinmawia (49) s/o Lalawia (L), Hnahthial Lungleng Vengte thubuai chu ni 16.7.2025 khan a titawp.

April 12, 2022 khan khatih hunlaia chief minister, Zoramthanga chu Facebook-a Zoram Politics Group I ah March 11, 2022 chhun dar 1 velah thah tuma vauna post a nih avangin Cyber Crime Police Station-ah FIR thehluh a ni.  An thu post-ah hian 'Lehkhathiam mi panga chuan intelkhawm chuan sniper ruaiin, CM chu kan ram hmasawnna muan chhana ngaiin, thla thum chhunga CM atanga a chawlh loh chuan thah a ni dawn' tih an post a ni.

He thu hi post tu hi Cyber Crime Police-te chuan chhuizuiin, Google leh Facebook Law Enforcement Team atangin document pawimawhte an dil a, chuta tang chuan hma an la chhunzawm. An chhuizui zelna atangin he Facebook account enkawltu chu Rodinliana (39) s/o T Ngursiama (L), Khawzawl Hermon Veng nia ngaiin an man a, a mobile phone pawh an man sak nghal.

Chhuizui zelin Rodinliana hian Facebook kaltlanga biak thin leh thurualpui nia ngaih 'CC Azyu' tia a profile name dah an awm tih an hre chhuak a, chu chu chhuizuiin Chanchinmawia (49) s/o Lalawia (L), Hnahthial Lungleng Veng ni ngeia ngaiin police-te chuan an man ve leh a ni.

Chanchinmawia hi Mamit Bialtu MLA H Lalzirliana a mawi lo zawnga post telah puh a ni. Hetihlai hian Rodinliana leh Chanchinmawia chuan puh an nihna hi an pha ve ve a, hriat pawh an inhre ngai lo niin an sawi.

Judicial Magistrate First Class-I chuan thurehtute thusawi, Rodinliana leh Chanchinmawiate thusawi leh Cyber Crime Police Station-in finfiahna an neih hrang hrangte a zirchian hnuah, rinhlelh awm deuh awm mah se, finfiahna a tha tawk loa ngaiin thubuai hi a ti tawp. He thubuaiah hian Rodinliana leh Chanchinmawiate hi an fihlim ta tihna a ni.