A HMA AIIN HEROIN A TLEM – EXCISE MINISTER
Nizan (17.10.202^) khan Kanan Branch YMA, Aizawl chuan an din champha vawi 53-na Kanan Middle School tual zawlah an lawm a, khuallian Excise & Narcotics Minister Lalnghinglova Hmar, Bialtu MLA chuan Mizoramah a hma aiin ruihhlo a tlem thu a sawi.
Excise & Narcotics Minister chuan naupang leh thalaite chu ruihhlo laka inthiarfilhlim turin a chah a,”Sawrkar leh Central YMA tangkawp hmalakna vangin tunlaiah a hma ai chuan heroina vâng tawh. Chutihrualin ganja leh khuh damdawi lamah thalai, a bikin tleirawl leh naupang zawkte an kal nasa,” tiin nu leh pate chu hemi kawnga an fate fimkhurpui tur leh, Kanan YMA-te pawh theihtawp lo chhuah zel turin a chah a ni.
Lalnghinglova Hmar chuan naupang leh thalaite tán Mizoramah thil ṭha tam tak a awm a, chung zingah chuan lehkha thiam a la ṭha ber tih a sawi a, “Zaninah lehkha thiam chawimawina hun in siam hi ka lawm a, naupangte pawh zirna ngaipawimawh ula, in zirna in neih ang angte pawh theih angin kan chei zel ang,” a ti a.
Kanan Branch YMA hian an dincham vawi 53-na hi thla khat chhung vel an lawm a, infiamna hrang hrang hmanga inelna neih a ni. Nizana lawmna pui ber hi session hnihah then niin, session khatnaah vengchhunga zirlai tithate chawimawina hun hman a ni a, Labour, Employment, Skill Development & Entrepreneurship (LESDE) Department hnuaia insak leh a kaihhnawiha thawkte tan hamthatna hrang hrang awm theihna, Mizoram Building & Other Construction Workers Welfare Board (MBOCWWB) chungchang inzirtirna hun hman a ni bawk.
Session hnihnaah tunlai zaithiam lar tak takte nen concert hun nuam tak hmangin rising day lawmna hun khar a ni.