Vawiin (19.11.2026) hian Buhchangphaiah Kolasib Bawrhsap H. Dolianbuaia leh SP Lalrinpuia Varte bakah Hailakandi Bawrhsap Jay Vikas leh Sr. SP Amitava Sinha-te chu district pahnih Forest DFO-te nen ramri chungchang leh thawhhona ṭha zawk neih dan tur sawihoin an inhmu.
He inhmukhawmnaah hian inremna lo awm sa anga ramri dinhmun pangngai (status quo) chu vawn nun zel turin an rel. Forest area chhunga dan loa oil palm leh kuhva chin te, mimal kawng laih leh thil dang sak (infrastructure) te chu khap a nih thu sawiin, hetiang thil a lo awm chuan a kaihhnawih thuneituten hma an la nghal ang a, Forest Conservation Act (FCA), 1980 bawhchhiatna a awm tur a ni lo tiin an sawiho a ni. Hemi rual hian Ramjani nallah leh Inner Line Reserve Forest (ILRF), Assam lam panna lei (bridge) leh culvert pahnih siam chungchanga dodalna (objection) awm chu a kaihhnawih thuneituten dan angin hma la rawh se, an ti.
Ramri venhimna leh thawhhona tiṭha zel turin Mizoram Forest leh Assam Forest thawktute bakah Assam Police-te ṭangkawpin joint patrolling neih thin nise an ti a, Mizorama tharchhuah kuhvate harsatna awm loa phurh chhuah a nih theih dan tur pawh ngun taka ngaihtuahin, chinfel dan ṭha zawk zawn nise tih a ni.
District pahnihte inkarah hmaichhan (physical) leh online (virtual) hmangin a khat tawka inhmukhawm ṭhin tur leh, inbiakpawhna leh thuthar inhrilh tawn zung zung nan WhatsApp group siam nise tiin an rel. Hemi bakah hian ruihhlo tawlhruk do kawngah district pahnihte ṭangkawpa NCORD protocol anga hma lak ho zel nise an ti bawk a ni.