Larsap General Vijay Kumar Singh chuan vawiin (19.11.2026) hian C. Zothankhuma, IDAS (Retd) chu Durbar Hall, Lok Bhavan-ah rinawmna thu tiam tirin Mizoram State Information Commission (MSIC) hnuaia State Information Commissioner (SIC) atan a lalut.
Lakluhna inkhawmah hian Chief Secretary mawhphurhna la mektu Sudhir Kumar chuan Larsapin State Information Commissioner atana C. Zothankhuma a ruatna notification a chhiar chhuak hmasa a, chumi hnuah Larsap chuan rinawmna thutiam chham tirin State Information Commissioner atan a lalut a ni. He hunah hian Chief Minister Lalduhoma, Lok Sabha MP Richard Vanlalhmangaiha, PWD Minister Vanlalhlana, RD Minister Prof. Lalnilawma, Adviser to Chief Minister Pu Lalmuanpuia Punte bakah mi pawimawh dangte leh chhungkhat lainate an tel a ni.
SIC atana lakluh tak Pu C. Zothankhuma, IDAS (Retd) hi December 17, 1966 khan a piang a, thiamna lamah M.A., LLB, BCS degree nei niin, kum 1991 khan Indian Defence Accounts Service (IDAS) hna a zawm. Defence Accounts Department hnuaia hna pawimawh tak tak thawka India ram hmun hrang hranga a awm kual hnuin Registrar, Mizoram University (MZU) hna chu kum 2013-2019 inkar khan a thawk a. Hemi hnu hian Defence Accounts Department hnuaia hna pawimawh tak takte chelh chhunzawm lehin September30, 2026 khan Additional Controller General of Defence Accounts, CGDA, New Delhi a chelh laiin superannuation pension-in a chhuak a ni.
A service hun chhung hian India ram hmun hrang hranga Defence Accounts Department Office hrang hrang endikna lam mawhphurhna a chelh thin bakah, pension kaihhnawih tiam loa vuivaina awmte ngaihtuahtu a ni thin.