A nupui thattua puh man a ni

Bawngkawn Police-te chuan ni 26.10.2025 khan H Lalromawii (31), Falkland Veng thattua puh a pasal Zothanpuia (45) an man a, police hnenah a nupui hi a thah a nih thu a sawi tawh.

Police atanga Bengvarna thudawn danin, Lalromawii hi an chenna inah thia hmu a nih tih report Bawngkawn Police-te chuan ni 26.10.2025 chawhma dar 10 vel khan an dawng a ni. A hnuah FIR pawh an dawng leh.

Bawngkawn Police leh Forensic Science Laboratory-te chu ruang awmna hmunah kal nghal vatin, an zirchian hnuah H Lalromawii chu thah a ni ngei tih an finfiah.

H Lalromawii pasal Zothanpuia hi manin, police-te chuan thu an zawtfiah a, a nupui hi a thah a nih thu a sawi. H Lalromawii lu hi vuakna avangin a kak a, sawisakna avangin a taksa hmun hrang hrangah duk leh pilh a awm.

H Lalromawii ruang hi Civil Hospital, Aizawlah postmortem a nih hnuah a ruang hi an khua Kawlbemah vui turin an thawn. H Lalromawii leh Zothanpuia hian fa pali an nei.

Police hotute sawi danin, tualthahna thleng chhan hi mipat hmeichhiatna thil vang a ni a, he thil kaihhnawihah hian an thenawmte nupa pawh thuzawhfiah atan lak an ni.