Vawiin (2.11.2026) tlai khan Chief Minister hoin CM Conference Hall-ah Assam Rifle ram chhuahsan hman zui dan tur reltu, pawl hrang hrang aiawhte Advisory Committee on AR Land chu an thukhawm a, an hmalak mekna thlirletin, an hmachhawp pawimawh zual an sawiho nghal.
Aizawl Square tur hi a kual chhuaka footpath siam ni se, a tlang a san deuh avangin rawt hniam deuh ni se, thing kih ngai a awm a nih pawhin kih aia tam, thing mawi zawk, Mizoram thing ngei, mumal leh hmuh nuam zawk tura phun ni se, an ti.
Tuna kawngpui zauh belh mek (Aizawl Spine Road) hi meter 14 a zauh a ni a, chu chuan metre 1.5 footpath a keng tel. Hei hi mipui lam atanga a zau tawk lo tia sawiselna a awm avangin tuna mi aia zaua zauh belh hlek tha an ti. A kawngko lungremte chu khawpui timawi thei tur ngaihtuah chung zela kalpui tha an ti.
Mandir sawnna hmun tur chungchangah Dak Inpui piah, Open Amphi Theatre sakna tura ruahman hmun thlen phei hma deuha hmunawl chu ruahman a ni.
Chhuahlama Bypass road laih mek Saron venga a chhuah pheina tur Baptist Kohhran Biak In hmun thar atan biak in awmna hnung, Modern School ram hnung, by-pass road thar leh Aizawl Square chhuahchhawng kawngpui thar tur inkar chu ruahman fel tawh a ni.
Bypass road thar hnuai, Bethlehem veng chunga forest area chu thing leh mau tichhe lo va, mipui lenvah theihna tura cheimawi dan tur; UD&PA Dept lamin an duang a, hna thawhna tur sum pawh a awm dawn. An ruahmanna hi committee hian an pawmsak a ni.
AR ram hmalakna hi March 17, 2026 khan Early Bird Project hawn (launched) a lo ni tawh a, hmun hrang hrangah kut thlak mek a ni.
Meeting-ah hian UD&PA Ministerr K. Sapdanga, Revenue Minister B. Lalchhanzova, Tourism Minister Lalnghinglova Hmar, Adviser to CM Lalmuanpuia Punte, Chief Secretary Khilli Ram Meena leh member dangte an tel a ni.