Association of Tour Operators Mizoram (ATOM) chuan thuchhuah siamin, tûn hnaia Surita Chakma-in thu belhchian dawl lo hmanga vantlang hmuhah Mizo hnam demna, deuhsawhna leh boruak chawk buai thei zawng thu a sawi chu pawi an tih thu tarlangin, “He thuchhuah kaltlang hian kan dem takzet a ni. Mizoram tourism sector aiawhtu pawl kan nih angin, hnam ia humhalh, inzahtawnna leh hnam inkar boruak muanawm vawnhim hi kan ngaipawimawh ber te zing a mi kan ni,” an ti.
An member-te hi kan ram aiawhtu pawimawh takte an nih avangin, kan hnam zia leh rohlûte hmuhsitna, Mizo hnam deuhsawhna emaw, kan ram mipuite inlaichînna tichhe thei zâwnga vântlâng hmuha thiltih emaw sawi emaw rêng rêng hi kan hnam zia leh vântlâng inkaihhruaina nen a inkalh tlat tih tarlangin ATOM chuan, “Hetiang taka Mizo hming tih bawrhbânna leh tih hminghliauna hi, executive committee chuan thutlukna khauh tak a siam . Kan Memorandum of Association (MoA) Clause 4/B/a/v in thuneihna min siamsak angin, Surita Chakma leh a agency MuroMuri te chu ATOM member an nihna aṭangin vawiin aṭang hian paih leh tihtâwp nghâl a ni. Hemi rual hian, ATOM chuan Surita Chakma leh a agency MuroMuri te nena inzawmna leh thawhhohna zawng zawng kan chhu chat hlen tih kan puangzâr a ni,” an ti.
ATOM chuan tourism leh hospitality industry lama an thawhpuite, regional affiliates leh stakeholders dangte hnenah hriattirna tihchhuah nghâl a nih thu tarlangin, “Hei hian kan industry chhûngah langtlang taka inpawhtawnna a siam bakah, kan thawhpuite chu khualzinte leh stakeholder zawng zawng tana boruak muanawm, zahawm leh hnam zia inzahtawnna hmun buatsaih turin a pui dawn,” an ti a, tourism ecosystem himna leh hmasâwnna humhalh zêl a nih theihna’n Surita Chakma leh a agency MuroMuri tour operation licensetihtawpsak tûrin Tourism Department hnênah ngenna an thehlût tih an tarlang.
Kan ram muanna, inpumkhatna leh hnam zahawmna tibawrhbâng leh tichhe thei zâwng a tourism kaihhnawih a chêtna a awm a nih chuan an en zui reng dawn tih tarlangin ATOM chuan, “Mizoram tourism stakeholder zawng zawngte kan hnam zia, zonun ze mawi leh inzahtawnna vawng nung zel turin kan inngênin kan insâwm bawk a ni. Mizorama tourism innghahna lungphûm chu muanna, inpumkhatna leh khualṭha thlenna a ni. Khualzinte tâna boruak muanawm leh zahawm buatsaih tur te, Mizo hnam zahawmna leh rohlûte theitâwpa vawnhim a, chawimawi zêl a nih theihna’n kan dinchhan hi nghet takin kan hlenchhuak zel dawn,” an ti.